بہارٕکۍ گورنر سید عطا حسینن کوٚر سرینگرَس منٛز وزیر اعلیٰ عمر عبداللہ ہَس سۭتۍ ملاقات، ملاقاتَس دوران باہمی دلچسپی مسلن پٮ۪ٹھ کَتھ باتھ ۔

بہارٕکۍ گورنر لیفٹیننٹ جنرل (ریٹائرڈ) سید عطا حسینَن کوٚر جموں و کشمیر کِس وزیر اعلیٰ عمر عبداللہَس سۭتۍ سرینگرَس منٛز تٔمۍ سٕنٛزِ رِہٲیشی جایہِ پٮ۪ٹھ اکھ اَہَم ملاقات۔ تفصیٖلَو مُطٲبِق سپٕز یہِ ملاقات آتھٕوارِ دۄہ عمر عبداللہ سٕنٛزِ ذٲتی رِہٲیشی جایہِ  پٮ۪ٹھ یۄس سرینگر کِس انتہٲیی مشہوٗر تہٕ حساس گپکار روڈَس پٮ۪ٹھ واقعہٕ چھےٚ۔ جموں و کشمیر حکوٗمتَن کٔر أکِس بیانَس منٛز امہِ ملاقاتٕچ تصدیٖق۔ بیانَس مُطٲبِق گوٚو دۄشوٕنۍ شخصِیَتن درمِیان مُلاقات سٮ۪ٹھاہ خۄشگوار ماحولَس اندر۔ ملاقاتَس دوران کٔر بہارٕک گورنر سید عطا حسین تہٕ جموں و کشمیر کِس وزیر اعلیٰ عمر عبداللہ ہَن باہمی دلچسپی ہٕنٛدٮ۪ن مُختٔلِف معاملَن پٮ۪ٹھ تفصیل سان کَتھ باتھ۔ اَتھ موقعَس پیٹھ کٔر دۄشوٕیو رہنُماہو مُلکٕچ موجودٕ صورتحالَس سۭتۍ سۭتۍ ترقیٲتی مسلن تہٕ باقٕے اَہَم موضوعَن پٮ۪ٹھ کَتھ باتھ۔