ایم بی بی ایس انٹرن پتہٕ کٔر ویٹرنری انٹرن ہُنٛد تہِ احتجاج، غیر معاینہ مدتس تام ہڑتالٕچ کال۔  

ایم بی بی ایس اِنٹرنَن ہٕنٛدِ س وظیفس منٛز ہُرٮ۪ر کرنٕچ منٛگ کٔرِتھ فاقہٕ ہڑتال شُروٗع کرنہٕ کہِ کینٛہہ دۄہ پتہٕ چھےٚ جموں و کشمیرَس منٛز چھِ ویٹرنری انٹرنَو تہِ پننِس ماہانہٕ الاؤنسس منٛز ہُرٮ۪ر کرنٕچ منٛگ کٔرمٕژ۔ انٹرنَو چھِ غٲر معاینہ مدتس تام ہڑتالٕچ دھمکی تہِ دِژمٕژ۔ 

جموں و کشمیر ویٹرنری سٹوڈنٹس ایسوسی ایشن (جے کے وی ایس اے) ہٕنٛز نُمٲینٛدگی کرن وٲلۍ طالب علمَو  کوٚر  ایس کے یو اے ایس ٹی کشمیر کیمپسَس منٛز وظیفس منٛز ہُریرٕچ منٛگ کٔرِتھ احتجاج۔ 

احتجاجَس دوران ووٚن بی وی ایس سی ہٕکۍ انٹرن ڈاکٹر سہیل احمد ڈارَن زِ یونیورسٹی اوس ترےٚ ؤری برٛونٛہہ حکوٗمتَس وظیفس منٛز ہُریرٕچ سفارش کٔرمٕژ، مگر یہِ فایل  چھےٚ 2023 پیٹھٕ محکمہٕ مالیاتَس منٛز زیر التوا ۔ تٔمۍ ووٚن زِ اسہِ چھِ صِرِف 6000 رۄپیہِ فی رٮ۪تہٕ وظیفہٕ مِیلان، ییٚلہِ زن مُلکہٕ چین باقٕے یوٗنیورسٹیَن منٛز  باقین 23.500 میلان چھِ۔