9 طٲلبہِ علمو پٮ۪ٹھہٕ175 طٲلبِ علمن تام چھُ گورنمنٹ سکول پنگلیناہن کامیٲبی ہٕنٛز اکھ نٔو مثال قٲیم کٔرمٕژ۔پلوامہ ہَس منٛز گورنمنٹ مڈل سکول پنگلینا ہَن چھُ جٔدیٖد سٔہوٗلِیات تہٕ وۅستادَن ہٕنٛزِ محنتہٕ سۭتۍ لوٗکَن ہُنٛد اعتماد بحال کوٚرمُت۔

پُلوامہ ہَس منٛز گورنمنٹ مڈل سکول پنگلینا ہَن چھِ سرکٲرۍ سکوٗلَن منٛز معیٲری تہٕ مُفت تٲلیٖمہِ ہٕنٛز اکھ نٔو مِثال قٲیِم کٔرمٕژ۔ صرف 9 طالب علمو سۭتۍ شروع گژھتھ چُھ سکول وۄنۍ 175 طالب علمن معیاری تعلیم فراہم کران۔ سکولَس منٛز چھِ نہ صرف جدید سٔہوٗلِیات بلکہِ پننٮ۪ن وۄستادَن ہٕنٛز وقف کوٗشِش تہِ۔ اَمہِ کارکردٕگی ہٕنٛدِس اعترافَس منٛز آو وۅستاد توفیق علی یَس یو ٹی سطحَس پٮ۪ٹھ بہتٔریٖن ٹیچر اعزاز دِنہٕ۔ از چھُ گورنمنٹ مڈل سکول پنگلینا عوٲمی شعبَس منٛز معیٲری تعلیمہِ ہٕنٛز اکھ روشن مثال پٲٹھۍ وۅتلان۔ سکولَس منٛز چھِ سمارٹ کلاس روم، اکھ جٔدیٖد آئی سی ٹی لیب، اکھ جدید کِنڈر گارٹن تہٕ باقی ضروٗری سٔہوٗلِیات یِم طالبہِ علمَن ہیچھنُک بہتر ماحول فراہم کران چھِ۔ دلچسپ کتھ چھِ یہِ زِ یتھ سکولس منٛز اَکہِ وقتہٕ صرف 9 طٲلب علم ٲسۍ، تتھ منٛز چھِ وۄنۍ تقریباً 175 طالب علم۔ سکول کِس جدید کِنڈر گارٹنَس منٛز چھِ نزدیٖکی علاقَو پٮ۪ٹھ تقریباً 42 لۄکٕٹۍ شُرۍ ابتدٲیی تعلیم حٲصِل کران۔