ترال تہٕ اونتی پورِ کٮ۪ن سرکٲرۍ سکوٗلَن منٛز عملٕچ کٔمی، طٲلبہِ عٔلِم پریشان۔

ییٚلہِ زَن اَکہِ طرفہٕ چھُ یہِ دعویٰ کرنہٕ یِوان زِ سرکٲرۍ سکوٗلَن منٛز چھِ تٲلیٖمی نظام ٹریکس پٮ۪ٹھ تھاونہٕ خٲطرٕ قدم تُلنہٕ یِوان، جٔنوٗبی کشمیر کٮ۪ن واریاہَن علاقَن منٛز چھِ سرکٲرۍ سکوٗلَن منٛز عملٕچ کٔمی  ییٚمہِ کِنۍ طالبہِ علمَن ہُنٛد مستقبل خطرَس منٛز لبنہٕ یِوان چُھ۔ ترال تہٕ جنوٗبی کشمیر کِس اونتی پورہ علاقَس منٛز چھِ طالبہِ علمَن تدریسی تہٕ غٲر تدریسی عملہٕ ہٕنٛز کٔمی کِنۍ شٔدیٖد مُشکِلات درپیش ۔ واریاہَن سکولَن منٛز چھِ وۄستادَن ہٕنٛز تعداد منظور شُدٕ عہدَو کھۄتہٕ کم، ییٚمہِ سۭتۍ تٲلیٖمی سرگرمی متٲثِر چھےٚ گَژھان۔ 

مقٲمی لوٗکَن تہٕ مٲلِس ماجہِ مُطٲبِق چھُ کینژھن سکوٗلَن منٛز أکِس وۅستادَس واریاہ کلاس پرناوٕنۍ پٮ۪وان، ییٚمیُک مطلب چھُ زِ طالبہِ علمَن چھُنہٕ ضروٗری توجہٕ مِیلان۔ اَمہِ علاوٕہ چھِ کینٛژھن  اِدارَن منٛز غٲر تدریسی عملہِ  ہٕنٛز کٔمی دفتری کامہِ تہِ متٲثِر کران۔ وُنکینَس چھِ گورنمنٹ ہائر سیکنڈری سکول دادسیرا ٹرالَس منٛز شیٚن لیکچررَن، ژۅن ماسٹر گریڈ وۄستادَن تہ دۅن وۄستادَن ہٕنٛز پوزیشنہٕ خٲلی ییٚمہِ کِنۍ لُکو سرکارس مطالبہ چُھ کوٚرمُت زِ یِہٕنٛدٮ۪ن شُرٮ۪ن ہٕنٛز تعلیٖم گژِھہ نہٕ یِنہٕ کالس منٛز متٲثر سپدٕنۍ۔