‘سٮ۪ٹھاہ محبتہٕ کِس نٔتیٖجَس منٛز جِنسی رِشتہٕ، جموں و کشمیر ہایی کورٹَن دِژ مُلزِم پُلسہٕ افسرَس ضمانت

جموں و کشمیر تہٕ لداخ ہائی کورٹَن دِژ أکِس پُلسہٕ سب انسپکٹرَس پیشگی ضمانت، یس پٮ۪ٹھ أکِس زنانہٕ سٲتھی سۭتۍ خانٛدر کرنُک وعدٕ کٔرِتھ مُبینہٕ طور جنسی استحصال کرنُک الزام چھُ۔ عدالتَن وُچھ زِ  اتھ معاملس منٛز چُھ زنانہِ ہٕنٛزِ رضامندی ہٕنٛزِ نوعیژ مُتعلِق سوال پٲدٕ گژھان تہٕ پُلسہٕ اَفسَر اوس گۄڈَے خانٛدر کٔرِتھ ۔

جسٹس سنجے دھرَن دِیُت پُلسہٕ اَفسَر سٕنٛدِس پیشگی ضمانتٕچ درخاستَس پٮ۪ٹھ 18 صفَن ہُنٛد فٲصلہٕ ۔یہِ درخاس اوس بھارتیہ نیا سنہیتا (بی این ایس)، 2023 کِس دفعہٕ 69، 83، 88، تہٕ 115(2) تحت سامبا پولیس تھانس منٛز درٕج کرنہٕ آمٕژ ایف آئی آر کِس سلسلَس منٛز درٕج کرنہٕ آمٕژ۔

عدالتَن کٔر واضح زِ امٕکۍ مشاہدٕ چھِ ضمانتہٕ کِس درخاستَس تام محدوٗد تہٕ چھِنہٕ الزامَن ہٕنٛز قونوٗنی حیثیتَس یا مقدمٕچ حتمی شکل تعین کران۔ تفتیش تہٕ مقدمَس دوران یِیہِ الزامَن ہُنٛد جٲیزٕ ہٮ۪نہٕ۔