کُلگام پولیسَن کٔر ژور گرام ہیروئِن برآمد تہٕ اکھ شخٕص آو گِرِفتار کرنہٕ۔

جوٚم-سری نگر قومی شاہراہَس پٮ۪ٹھ کٔر پولیسَن نشاور ادویاتَس خٕلاف سخٕت کاروٲیِی، ہیروئِن ہیوٗ ژور گرام مادٕ برآمد تہٕ اکھ شخٕص کوٚرُکھ گِرِفتار۔
جٔنوٗبی کٔشیٖرِ ہِنٛدِس ضِلعہٕ کُلگامَس منٛز چھِ پولیسَن نشاور ادوِیاتٕچ اسمگلنگ تہٕ غٲر قونوٗنی تجارتَس خٕلاف پنٕنۍ کاروٲیی جٲری، تہٕ کٔرٕکھ نُمایاں کامیٲبی حٲصِل۔ سرینگر-جموں قومی شاہراہَس (NH-44) پٮ۪ٹھ چکا وانگنٛڈ کراسنگَس نزدیٖک أکِس کامیاب کاروٲیی دوران کٔر پُلسن مبینہ طور ژور گرام ہیروئِن ہیوٗ مادٕ برآمد تہٕ اکھ شخٕص رٔٹُکھ رنگہٕ اتھہٕ۔

پُلسہٕ مُطٲبِق آیہِ یہِ کاروٲیی أکِس معموٗل چوکی دوران کرنہٕ، ییٚتہِ اکھ پیدَل پَکن وول شَکاوَر حرکتہٕ باپتھ رُکاونہٕ تہٕ تلٲشی آیہِ کرنہٕ۔ کُلگام پُلسہٕ طرفہٕ دِنہٕ آمٕژ تَفصیٖلات چھِ اِشارٕ دِوان زِ قومی شاہراہَس پٮ۪ٹھ چکا وانگُنٛڈ کراسنگَس نزدیٖک چیک پوسٹَس پٮ۪ٹھ رُکوو أکۍ پُلسہٕ پارٹی اکھ شخٕص یُس چاکا وانگُنٛڈ پٮ۪ٹھٕ قاضی گُنٛڈ کُن پَکان اوس۔ شَکَس پٮ۪ٹھ ییٚلہِ تلٲشی آیہِ کرنہٕ، أمۍ سٕنٛدِس قبضَس منٛز آو اکھ کرٛہنہِ رنٛگُک پولی تھین بیگ لبنہٕ۔