سجاد لونن دیُت عمرعبداللہ ہس جموں و کشمیر خٲطرٕ اَہَم دۄہَس پٮ۪ٹھ مُبارک باد ۔

پیپلز کانفرنسٕکۍ سربراہ سجاد لون دِژ بۄدوارِ دۄہ عمر عبداللہ ہَس مبارکباد۔
نیشنل کانفرنسُک نٲیِب صدٕر عمر عبداللہ کَرِ آز ییٚتہِ ایس کے آٮٔی سی سی یَس منٛز وزیر اعلیٰ سُنٛد حلف ۔
آز جموں و کشمیر کٮ۪ن لوٗکَن باپتھ اکھ اَہَم دۄہ قرار دِوان ووٚن سجاد لون زِ جموں و کشمیرَس منٛز چھِ پانٛژو ؤرۍ یَو کھۄتہٕ زِیٛادٕ وقتہٕ پتہٕ عوٲمی حکومت بحال یِوان کرنہٕ۔

تٔمۍ ووٚن X پٮ۪ٹھ أکِس پوسٹَس منٛز زِ "یہِ چھُ جموں و کشمیر کٮ۪ن لوٗکَن باپتھ اکھ اَہَم دۄہ، لوٗکَن ہٕنٛز حکومت چھِ پانٛژو ؤرۍ یَو کھۄتہٕ زِیٛادٕ وقتہٕ پتہٕ بحال یِوان کرنہٕ”۔

تٔمۍ ووٚن زِ اسہِ پَزِ یہِ یاد تھاوُن زِ پٔتِم اسمبلی ٲس مُلکٕچ ساروِی کھۄتہٕ زِیٛادٕ بااختیار اسمبلی ، آز چھِ یہِ اسمبلی شایَد ساروِی کھۄتہٕ زِیٛادٕ طاقتور اسمبلی ۔

لون ووٚن پنٛنِس پوسٹَس منٛز، "وۄمید چھِ زِ أسۍ کَرِ دُبارٕ حٲصِل یُس 5 اگست 2019 ہَس منٛز اسہِ نِش نِنہٕ آو تہٕ یُس تہِ سون صحیح چھُ”۔
تٔمۍ دِژ جموں و کشمیر نیشنل کانفرنس تہٕ عمر عبداللہ ہَس پنٕنۍ نیک خواہشات تہٕ مبارکباد