جموں و کشمیر اسمبلی ہُنٛد بجٹ اجلاس گوٚو لیفٹیننٹ گورنر سٕنٛدِ خطاب سۭتۍ شروع۔
جموں و کشمیر اسمبلی ہُنٛد رٮ۪تُک بجٹ اجلاس گوٚو ژٔنٛدٕروارِ دۄہ صُبحٲے لیفٹیننٹ گورنر منوج سنہاہَن ییٚتہِ اسمبلی کمپلیکسَس منٛز خطاب کرنہٕ سۭتۍ شُروٗع۔ یَتھ بجٹ اجلاسس دوران کَرِ وزیر اعلیٰ عمر عبداللہ 7 مارٕچ 2025 ہَس منٛز 2025-26 ؤرۍ یَس خٲطرٕ مرکزی زیر انتظام علاقہٕ جموں و کشمیرُک گۄڈٕنیُک بجٹ پیش۔ 40 دۄہَن ہِنٛدِس بجٹ اجلاسس منٛز آسہِ کُل 22 میٹنگہٕ۔ یہِ آسہِ مركزی زیر انتظام علاقہٕ جموں و کشمیرٕچہِ قونوٗن ساز اسمبلی ہُنٛد دۄیِم اجلاس۔
ذٲتی ارکانن ہٕنٛزن قراردادن خٲطرٕ چھِ زٕ دۄہ تہٕ ذٲتی ارکانن ہٕنٛدٮ۪ن بِلن خٲطرٕ اکھ دۄہ مُقرر کرنہٕ آمٕتۍ۔ جموں و کشمیر قونوٗن ساز اسمبلی ہُنٛد گۄڈٕنیُک پانٛژن دۄہَن ہُنٛد اجلاس آو 4-8 نومبر 2024 سری نگرَس منٛز مُنعقد کرنہٕ۔ جموں و کشمیر چھُ سَتن ؤرۍ یَن ہٕنٛدِ طویل وقفہٕ پتہٕ پننہِ قانون ساز اسمبلی ہُنٛد گۄڈٕنیُک بجٹ اجلاس منعقد کران۔ جموں و کشمیرُک پٔتِم بجٹ اجلاس اوس 2018 ہَس منٛز مُنعقد کرنہٕ آمُت ییٚلہِ پی ڈی پی-بی جے پی مخلوط حکومتَس منٛز تَمہِ وقتُک وزیر خزانہ حسیب درابوَن جنؤریَس منٛز بجٹ پیش کوٚر۔