کٔشیٖرِ منٛز روٗد جٲری، کینٛہہ اَہَم سڑکہٕ بنٛد.

وادی کشمیر کٮ۪ن مٲدٲنی علاقن منٛز روٗد پٔتمہِ 24 گھنٹَو پٮ۪ٹھ شٔدیٖد روٗد جٲری، ییٚلہِ زن پہٲڑی علاقَن منٛز شیٖن پیوٚو، ییٚمہِ سۭتۍ وادی منٛز عام زندگی مُتٲثِر گٔیہِ۔ مُتعلقہٕ محکمہٕ کِس ترجُمانَس مُطٲبِق چھُ یِنہٕ والٮ۪ن 24 گھنٹَن دوران وادی منٛز یِتھۍ موسمی حالات جٲری روزنُک امکان۔ دوٚیمہِ طرفہٕ ییٚلہِ زَن سٮ۪ٹھا روٗد پینہٕ کِنہِ وادی کٮ۪ن واریٛاہَن بۄنِمٮ۪ن علاقن منٛز سڑکہٕ ڈٔبِتھ چھِ، ییٚمہِ سۭتہِ لوٗکَن سڑکہِ اَپار گژھُن مُشکِل گوٚومُت چھُ، مُغل روڈ، لیہہ شاہراہ، سنتھن روڈ، گُریز-بانڈی پورہ روڈَس پٮ۪ٹھ چھِ ٹریفک ہٕنٛز نقل و حرکت شیٖن پینہٕ کِنہِ رُکاونہٕ آمٕژ۔ خراب موسمی حالتہٕ وٗچھِتھ کوٚر حُکامو بَٹہٕ وارِ دۄہ شُمٲلی کشمیر کِس بانڈی پورہ ضِلعہٕ کِس تالِل تہٕ گُریز علاقن منٛز سکوٗلَن منٛز کلاسٕچ کٲم معطل کرنُک اعلان۔ حُکمَس مُطٲبِق چھِ تحصیل تالیلَس منٛز ٲٹھمہِ جمٲژ تہٕ گُریز تحصیٖلَس منٛز پانژمہِ جمٲژ تام کلاسٕچ کٲم رُکاونہٕ آمٕژ۔