پہلگام سانحہٕ: مرن وٲلۍ سیاحَن ہٕنٛزٕ لاشہٕ خصوٗصی پروازٕ ذٔریعہٕ روانہٕ۔

پہلگامَس منٛز بۄموارِ دۄہ وحشیانہٕ دہشت گردانہ حملہٕ پتہٕ کوٚر جموں و کشمیر اِنتِظامیاہَن مارنہٕ آمتین سیاحَن ہٕنٛزٕ لاشہٕ تِہنٛدٮ۪ن آبٲیی مقامَن تام واتناونہٕ خٲطرٕ خاص ہوٲیی انتظام۔

حکامَو ووٚن زِ یہِ فٲصلہٕ اوس مُتٲثِر خاندانَن فوری مدد فراہم کرنہٕ باپتھ "انسٲنی تہٕ فوری اقدامات” کِس حصہٕ پٲٹھۍ نِنہٕ آمُت۔

ذٔرایعو مُطٲبِق آیہِ حملَس منٛز ہلاک گژھَن والٮ۪ن 26 نفرَن ہٕنٛز شناخت کرنہٕ تہٕ ضروٗری قونوٗنی کاروٲیی پوٗرٕ کرنہٕ پتہٕ تمام لاشہٕ سرینگر کِس پولیس کنٹرول رومس (پی سی آر) منتقل کرنہٕ، ییٚتہِ تِمَن پوٗرٕ سرکٲری اعزاز سۭتۍ الوداع کرنہٕ آو۔