بانڈی پورہَس منٛز لشکر طیبہ نیٹ ورکُک پردٕ فاش، 4 ملی ٹنٹ سٲتھی چھِ ہتھیار تہٕ گولہٕ باروٗد ہیتھ گِرِفتار کرنہٕ آمٕتۍ۔
أکِس بٔڑِس آپریشنَس منٛز چھُ بانڈی پورہ پولیسَن لشکر طیبہ (ایل ای ٹی) سۭتۍ وابستہٕ ملی ٹنٹ سٲتھیَن ہُنٛد اکھ سرگرم نیٹ ورکُک پردہ فاش کوٚرمُت تہٕ ژور مشتبہ افراد گِرِفتار کٔرۍمٕتۍ۔ گِرِفتار کرنہٕ آمتیٚن نفرَن ہِنٛدِ قبضہٕ منٛزٕ چُھ بٔڑِس تعدادس منٛز ہتھیار تہٕ گولہٕ باروٗد تہِ برآمد کرنہٕ آمُت۔ پُلیٖس کِس ترجمانَس مُطٲبِق ٲس تِمَن قٲبلِ اعتماد اطلاع مِلٮ۪ومٕژ زِ کینٛہہ ملی ٹنٹ سہولت کار چھِ پننٮ۪ن ہینڈلرزن ہِنٛدِس ہِدایتَس پٮ۪ٹھ سیکورٹی فورسَن تہٕ غٲر مقٲمی لوکَن پٮ۪ٹھ حملہٕ کرنٕچ سٲزِش کران۔ تٔمۍ ووٚن زِ ییٚلہِ یہِ زانٛکٲری مِلی، سیکورٹی فورسَو کٔرۍ بانڈی پورہ کٮ۪ن مُختٔلِف جایَن پٮ۪ٹھ خصوٗصی ناکا قٲیِم۔
ترجمانَس مُطٲبِق کٔر بانڈی پورہ پولیس، 45 بٹالین سی آر پی ایف (ڈی کمپنی) تہٕ 13 راشٹریہ رائفلز (ای کمپنی) مُشترکہٕ طور کنینائڈ کھائی سمبلَس منٛز اکھ ناکا قٲیِم یَتھ دوران محمد رفیق کھانڈے محمد افضل کھنڈے کِس روزَن وٲلۍ محمد افضل کھانڈے تہٕ مختار احمد ڈار محمد یوسف ڈار آر او بن پورہ ایس کے بالاہَس منٛز گرفتار کرنہٕ آیہِ۔