کٔشیٖر: ہوٲیی جہازَن ہٕنٛز آ واز، وادی منٛز غٲر معموٗلی فوجی نقل و حرکت۔

پہلگامَس منٛز حالٕے ملی ٹنٹ حملہٕ پتہٕ چھِ وادی کشمیرَس منٛز سیکیورٹی صورتحال واریٛاہ کشیدٕ گٔمٕژ، تہٕ اتھ تناظرس منٛز، سری نگرَس سۭتۍ وادی کٮ۪ن واریٛاہَن ضِلعن منٛز لڑاکا جہازَن ہٕنٛز پرواز تہٕ ہوہَس منٛز گرجٕچ آوازَو کٔر راتھ رٲژ لوٗکَن منٛز تشویش ہُنٛد لہر پٲدٕ۔ مقٲمی بسکیٖنن ہُنٛد وَنُن چھُ زِ آسمانہٕ پٮ۪ٹھٕ لڑاکا جہازَن ہٕنٛز آواز آیہِ رٲژ واریٛاہ لَٹہِ بوزنہٕ، ییٚمہِ سۭتۍ خوف تہٕ اضطراب ہُنٛد ماحول پٲدٕ گوٚو۔ عام لوٗکَو ووٚن زِ جنگی جہازَن ہٕنٛز جٲری نقل و حرکت چھِ اَمہِ کَتھِ ہُنٛد اِشارٕ دِوان زِ سیکورٹی فورس چھِ کُنہِ تہِ مُمکنہٕ خطرٕ سۭتۍ مُقابلہٕ کرنہٕ خٲطرٕ پوٗرٕ تیاری۔
ذٔرایعو مُطٲبِق چھُ پہلگام حملہٕ پتہٕ لائن آف کنٹرول (ایل او سی) پٮ۪ٹھ ہندو پاک فوجس درمیان واریاہ تناؤ پٲدٕ گژھان، ییٚتہِ وقفہٕ وقفہٕ فائرنگ تہٕ گولہ باری ہٕنٛز خبرٕ چھِ یِوان۔ دِفٲعی ذٔرایعن ووٚن زِ ہِنٛدُستٲنہِ ہوٲیی فوج تہٕ باقٕے حِفاظتی ایٚجنسِیہِ چھےٚ ہاے الرٹس پیٚٹھ تہٕ ہَوٲیی نگرٲنی ہُنٛد دٲیرٕ چُھ مٔزیٖد بَڑاونہٕ آمُت۔