منشیات تہٕ نشہ آور مادَن خٕلاف منظم مُہِم چلاونٕچ ضروٗرت: ڈاکٹر فاروق عبداللہ

جموں و کشمیر نیشنل کانفرنسٕک صدر ڈاکٹر فاروق عبداللہَن ووٚن نشہ آور دوا کِس خلاف بین الاقوٲمی دۄہ کِس موقعس پٮ۪ٹھ پننِس پٲغامَس منٛز زِ عالمی سطحَس پٮ۪ٹھ منشیاتُک پھیلاؤ چھُ انسانیت خٲطرٕ سٮ۪ٹھاہ تشویش تہٕ عکاسی ہُنٛد معاملہٕ۔ تٔمۍ دِیُت اَتھ کَتھِ پٮ۪ٹھ زور زِ مہذب مُلکن چھِ فوری طور متحد گژھنٕچ تہٕ منشیاتَن خٕلاف اکھ جامع تہٕ منظم مُہِم شروع کرنٕچ ضروٗرت۔ ڈاکٹر فاروق عبداللہَن دِیُت اصرار زِ نشہ آور تہٕ نقصان دہ مادَن پٮ۪ٹھ گژھہِ پوٗرٕ پابٔنٛدی لگاونہٕ یِن تہٕ یِہنٛدِس استعمال تہٕ فروختَس خٕلاف قونوٗن گژھن سخت بناونہٕ یِنۍ۔