کانگریس کَرِ جنوٗبی کشمیر پٮ۪ٹھٕ پنٕنۍ ” سٲنۍ ریاست تہٕ سون حق” مُہِم شروع۔

جموں و کشمیر پردیش کانگریس کمیٹی (جے کے پی سی سی) کَرِ پنٕنۍ سیٲسی مُہِم ‘آور سٹیٹ آور رائٹ’ بٹوارِ دۄہ جنوبی کشمیر کِس کُلگام ضلعہٕ پٮ۪ٹھٕ شروع۔ اَمہِ مُہِمہِ ہُنٛد مقصد چھُ جموں و کشمیرُک مُکمل رِیاستُک درجہٕ حٲصِل کرنٕچ وکالت کرٕنۍ، تہٕ امہِ مُہِمہِ ہُنٛد گۄڈنیُک مرحلہٕ چھُ جوٚمَس منٛز ختٕم گوٚمُت۔ پارٹی ہٕنٛدۍ ترجُمانَن ووٚن زِ کٔشیٖرِ منٛز یہِ مُہِم باضٲبطہٕ شُروٗع کرنہٕ کِس موقعَس پٮ۪ٹھ کَرِ جے کے پی سی سی صدر طارق کارا تہٕ کانگریس لیجسلیچر پارٹی ہُنٛد رہنُما غلام احمد میر پارٹی کارکُنَن خطاب ۔ تٔمۍ کوٚر ذِکِر زِ اَمہِ مُہِمہِ ذٔریعہٕ چھُ پارٹی ہُنٛد مقصد خٕطس منٛز جمہوری حقوٗقن خٲطرٕ پنٕنۍ آواز بلند کرنہٕ خٲطرٕ بنیٲدی سطحس پٮ۪ٹھ لوٗکَن سۭتۍ جُڑُن، خاص طور پٲٹھۍ ریاستُک درجہٕ بحال کرنہٕ خٲطرٕ۔ أتھۍ دوران چھِ نیشنل کانفرنس ریاستُک درجہٕ بحال کرنُک مُطالبہٕ جٲری تھوان۔ وزیر اعلیٰ عمر عبداللہ ییٚلہِ حالٕے منٛز ریاستُک درجہٕ بحال کرنَس مُتعلِق پرژھنہٕ آو ووٚن: ‘بَحَژ چھِ جٲری۔ أس چِھ یژھان زِ یم بحثہٕ گژھن کُنہٕ نتیجس پیٹھ واتُن تہٕ اسہٕ گژھہٕ پنن حق حأصل کرُن۔’