شری امرناتھ یاترا: 6000 کھۄتہٕ زِیٛادٕ زائرینن ہُنٛد بیاکھ اکھ قافلہ بھگوتی نگر بیس کیمپ پٮ۪ٹھٕ کٔشیٖرِ کُن روانہٕ۔

بۄموارِ دۄہ صبحٲے سالانہٕ شری امرناتھ جی یاترا خٲطرٕ زائرین ہُنٛد بیاکھ اکھ قافلہ بھگوتی نگر بیس کیمپ پٮ۪ٹھ سخت حفاظتس منٛز کشمیر روانہٕ۔ سرکٲرِ ذٔرایعو دِژ اطلاع زِ بۄموارِ دۄہ صُبحٲے گوٚو 6,388 زائرین پٮ۪ٹھ مشتمل اکھ قافلہ بھگوتی نگر بیس کیمپ پٮ۪ٹھٕ 248 لۄکٹٮ۪ن تہٕ بٔڑٮ۪ن گاڑیٚن منٛز کٔشیٖرِ کُن روانہٕ۔ تِمَو ووٚن زِ یِمَو زائرین منٛز چھِ 3,887 جنوٗبی کشمیر کِس ضلعہٕ اننت ناگَس منٛز واقع نُنوان پہلگام بیس کیمپس کُن گژھان، ییٚلہِ زَن 2,501 زائرین وسطی کشمیر کِس ضلعہٕ گنٛدربلَس منٛز واقع بالتال بیس کیمپس کُن چھِ گژھان۔