جوٚمَس منٛز اکھ بین ریاستی ڈرگ نیٹ ورک بے نقاب,2گِرِفتٲر،ممنوعہ چیز ضبط :پُلیٖس

جموں و کشمیر پولیسَن چھُ جوٚمَس منٛز اکھ بین ریاستی ڈرگ نیٹ ورک بے نقاب کوٚرمُت، یَتھ منٛز زٕ منشیات سمگلر گرفتار کٔرۍ تہٕ یِمَن نِش چھِ واریٛاہ مقدارَس منٛز ممنوعہ چیز ضبط کٔرمٕتۍ۔ پُلیٖسٕکہِ ترجُمانَن دِژ أکِس بیانَس منٛز تفصیٖل فراہم کٔرِتھ زِ میران صٲب پُلیٖس تھانہٕ کِس أکہِ ٹیٖمن کٔر بہلولَس منٛز أکِس چیک پوسٹَس دوران زٕ منشیات سمگلر گِرِفتار ۔ أمۍ ووٚن زِ تلاشی دوران آو یِہنٛدِ قبضہٕ منٛزٕ 11.6 کِلوگرام بھنٛگ ہیوٗ ممنوعہ چیز ضبط کرنہٕ، تہٕ رجسٹریشن نمبر JK02CX – 6327 وول اکھ موٹرسائیکل تہِ ضبط کرنہٕ۔ گِرِفتار کرنہٕ آمتیٚن نفرَن ہِنٛز شناخت ٲس مدھیہ پردیش کِس مدنی پوٗرُک روزَن وول سیلا سُنٛد گردھاری لال تہٕ اتر پردیش کِس جمال پوٗرُک روزن وول وجے چودھری سُنٛد نیٚچُو سورج کُمار پٲٹھۍ کرنہٕ آمُت۔ بیانَس منٛز چھُ ذِکِر کرنہٕ آمُت زِ دۄشوٕے نفر ٲسۍ منشیاتٕک سمگلر پٲٹھۍ کٲم کران، تہٕ مزید تحقیقاتس سۭتۍ چھِ امہِ ڈرگ نیٹ ورکس مُتعلِق مزید معلوٗمات میلنٕچ وۄمید چھِ۔ یہِ اوسُکھ نوٹ کوٚرمُت زِ اَتھ سلسلَس منٛز چھُ مٔزیٖد تحقیٖقاتہٕ باپتھ این ڈی پی ایس ایکٹَس تحت میران صاحب پولیس سٹیشنَس منٛز اکھ کیس درٕج کرنہٕ آمُت۔