بڈگام تہٕ نگروٹہٕکۍ لوٗکھ کرن یقینی طور اسہِ پیٹھ بھروسہ: جاوید احمد ڈار

زراعت، دیہی ترقی تہٕ پنچایتی راج کِس ؤزیٖر جاوید احمد ڈار سُنٛد خیال چھُ زِ بڈگام تہٕ ناگروٹہ حلقَن ہٕنٛدۍ لوٗکھ کرن نیشنل کانفرنسَس پٮ۪ٹھ بھروسہٕ تہٕ پارٹی ہٕنٛدٮ۪ن وۄمیدوارن بناون کامیاب ۔
تٔمۍ کٔر دِلہِ منٛز گاڑِ دھماکٕچ سخٕت مذمت تہٕ ووٚنُن زِ ایجنسی چھِ امیُک تفتیش کران۔
وزیرَن کوٚر بۄموارِ دۄہ ییٚتہِ نامہ نگارن ہٕنٛدٮ۪ن سوالَن ہُنٛد جواب دِوان یِمن خیالاتن ہُنٛد اظہار۔
ییٚلہِ بڈگام تہٕ ناگروٹا ضمنی چُناوس مُتعلِق پرٛژھنہٕ آو تٔمۍ ووٚن: ‘نیشنل کانفرنس چھےٚ ہمیشہٕ زیننہٕ خٲطرٕ لڑان۔ اسہِ چھِ اصل کٲم کٔرمٕژ، تہٕ بہٕ چھُس وۄمید کَران زِ بڈگام تہٕ ناگروٹا ہٕکۍ لوٗکھ کرن یٔقیٖنی طور اَسہِ پٮ۪ٹھ بھروسہٕ۔’
دِلہِ گاڑِ دھماکٕچ سخٕت مذمت کٔرِتھ ووٚن تٔمۍ : ‘نیشنل کانفرنس چھےٚ اَمِچ سخٕت مذمت کران۔ تفتیش چھےٚ جٲری، تہٕ ایجنسین ہٕنٛز تفتیش پوٗرٕ کرنہٕ پتہٕ ہٮ۪کَو أسۍ اَتھ پٮ۪ٹھ تبصرٕ کٔرِتھ۔’