وزیر اعلیٰ عمر عبداللہ ہَن کوٚر دِلہِ دھماکَس پٮ۪ٹھ غمُک اِظہار، مرن والٮ۪ن ہٕنٛدٮ۪ن عیالَن سۭتۍ ہمدردی ہُنٛد اظہار

جموں و کشمیرٕکۍ وزیر اعلیٰ عمر عبداللہ ہَن کوٚر دِلہِ ہٕنٛدِس لال قلعہ میٹرو سٹیشنَس نزدیٖک ہولناک دھماکَس پٮ۪ٹھ سٮ۪ٹھاہ صدمہٕ تہٕ غمُک اِظہار، یَتھ منٛز واریاہ نفر ہلاک تہٕ زخمی گٔے۔ عمر عبداللہ ہَن لیوٚکھ”Xَ” پٮ۪ٹھ : ‘مےٚ گوٚو دِلہِ دھماکٕچ خبر بوٗزِتھ سٮ۪ٹھاہ دُکھ۔ اَتھ سانحَس منٛز چھُ قۭمتی اِنسٲنی جانَن ہُنٛد ضایع گژھُن ناقابلِ تلٲفی۔ بہٕ چھُس مُتٲثِر خاندانَن سۭتۍ دِلہٕ ہمدردی پیش کران تہٕ زخمیَن ہِنٛز جلد صحت یٲبی باپتھ دُعا کران ۔’ یہِ چھُ قٲبلِ ذِکِر زِ ژٔنٛدٕروارِ دۄہ شامَس گوٚو لال قلعہ میٹرو سٹیشنَس نزدیٖک أکِس گاڑِ منٛز اکھ زبردست دھماکہٕ، یَتھ منٛز کم از کم داہ نفر ہلاک تہٕ باقٕی واریاہ زخمی گٔے، ییٚلہِ زَن واریاہ گاڑِ گٔیہِ پوٗرٕ پٲٹھۍ تباہ۔