دِلہِ بم دھماکہٕ پتہٕ جموں و کشمیرس منٛز ہائی الرٹ۔ سرینگر تہٕ جمِس منٛز سخت حفٲظتی انتظامات

جموں و کشمیرَس منٛز چھِ دِلہِ لال قِلعَس نزدیٖک أکِس خوفناک کار بم دھماکس پتہٕ سیکورٹی ایجنسییہِ ہائی الرٹس پٮ۪ٹھ تھاونہٕ آمژٕ۔ رِیاستی راز دٲنۍ سرینگر تہٕ جوٚمَس منٛز چھِ سیکورٹی فورسَن بٔڑِس پیمانَس پٮ۪ٹھ تلاشٕچ کاروٲیی شُروٗع کٔرمٕژ تہٕ حساس مقامَن، اَہَم تنصیبات تہٕ مصروٗف بازرَن پٮ۪ٹھ چھِ حفٲظتی گشت تیز کرنہٕ آمٕتۍ۔ ذرایعو مُطٲبِق چھُ پولیس، سی آر پی ایف، تہٕ باقی سیکورٹی ایجنسیَن ہدایت دِنہٕ آمٕتی زِ تِم تھٲوِنۍ کُنہِ تہِ شَکاوَر حرکتَس پٮ۪ٹھ پوٗرٕ نظر ۔ سرینگر شہرٕک دٲخلی تہٕ نٮ۪بر نیرنٕچ جاے، لال چوک، ڈل گیٹ، بٹامالو، جہانگیر چوک، نوگام تہٕ بیمینا علاقَن پٮ۪ٹھ چھےٚ خصوٗصی چوکی قٲیِم کرنہٕ آمژٕ ییٚتہِ فوج پایدل پکن والٮ۪ن، موٹر سائیکل چلاون والٮ۪ن تہٕ گاڑٮ۪ن ہُنٛد پوٗرٕ پٲٹھۍ معٲینہٕ کران چھِ ۔ أتھۍ دوران چُھ جوٚم شہرَس منٛز سیکورٹی فورسَن ہٕنٛز تہِ ہُشٲری سخت کرنہٕ آمٕژ۔ پُلیٖس تہٕ سی آر پی ایفٕچ مُشترکہٕ ٹیٖمہِ چھےٚ بس سٹینڈ، ریلوے سٹیشن، رگھوناتھ مارکیٹ، پرٛون جوٚم تہٕ گاندھی نگر ہِوین علاقن منٛز 24 گٲنٛٹن گشت کران، گاڑٮ۪ن ہِنٛز تلاشییہِ چھےٚ جٲرِی۔