پلوامِس منٛز زٕ ڈرگ ڈِیلَر گِرِفتار، چرٕس برآمد: پُلیٖس

نشاور ادوِیاتٕچ سَمگلِنگ خٕلاف مُہِم جٲری تھاونہٕ خٲطرٕ چھِ پلوامہ پولیسَن زٕ ڈرگ ڈِلَر گِرِفتار کٔرمٕتۍ تہٕ یِمَن نِش چھُ بٔڑِس مِقدارَس منٛز چرٕس ہیوٗ مادٕ برآمد کوٚرمُت۔
پُلسہٕ کہِ ترجمانَن ووٚن أکِس بیانَس منٛز زِ پلوامہ پولیسٕکہِ أکہِ ٹیٖمَن رُکٲوۍ زٕ نَفر تنگ پونا روڈَس پٮ۪ٹھ أکِس چوکی دوران یِم قٲل پٮ۪ٹھٕ تانگپونا یِوان ٲسۍ، یِم زٕ نایلان بیگ ہٮ۪تھ ٲسۍ۔
تٔمۍ ووٚن زِ تلٲشی دوران آو تِہنٛدِ قبضہٕ نِش 20.675 کِلو ممنوعہ مادٕ برآمد کرنہٕ، ییٚمہِ پتہٕ آیہِ دۄشوے موقعہٕ پٮ۪ٹھے گِرِفتار کرنہٕ۔
مُلزِمن ہٕنٛز شناخت چھِ کند جن بڈگامٕکۍ روزَن وٲلِس بشیر احمد واگے سُنٛد نیٚچُو، تنویر احمد واگے تہٕ واش بگ پلوامہ کِس روزَن وٲلِس محمد عبداللہ شاہ سُنٛد نیٚچُو محمد مقبول شاہ ناوٕ سۭتۍ کرنہٕ آمٕژ۔
پُلسہٕ ترجمانَن ووٚن زِ اَتھ سلسلَس منٛز چھُ پلوامہ پُلسہٕ تھانس منٛز ایف آئی آر نمبر 5/2026 تحت این ڈی پی ایس ایکٹ کِس مُتعلقہٕ دفعَن تحت مقدمہٕ درٕج کرنہٕ آمُت، تہٕ مٔزیٖد تفتیش چھُ شُروٗع کرنہٕ آمُت۔
تٔمۍ ووٚن ووٚن زِ پلوامہ پولیس چھِ سماجَس منٛز نشاور ادوِیات ختم کرنہٕ باپتھ پرعزم ۔