پلوامہ ہَس منٛز ڈرگ ڈیلر سٕنٛز جائیداد ضبط ۔
منشیاتٕچ اسمگلنگ خٕلاف سخت کارروائیَن تہٕ امہِ غٲر قونوٗنی تجارتُک مٲلی ڈانٛچہٕ ختم کرنٕچ مُہمہِ تحت چھُ پلوامہ پولیسَن کریم آباد علاقَس منٛز واقعہٕ أکِس رہٲیشی جایداد پٮ۪ٹھ قبضہٕ کوٚرمُت، یَتھ مُطٲبِق چھُ لچھَن رۄپیہِ ہُنٛد مُلُک وننہٕ یِوان۔
پُلسہٕ مُطٲبِق چھُ یہِ مکانہٕ کھتا نمبر 992، خسرہ نمبر 1735 تہٕ پلاٹ نمبر 485 وٲلِس زمینس پٮ۪ٹھ بناونہٕ آمُت، تہٕ یہِ چھُ کریم آبادٕکۍ روزَن وٲلِس غلام نبی میر سٕنٛدِس نیچوِس فیاض احمد میر سٕنٛز ملکیت۔
تحقیقاتَو سۭتۍ چھُ پتہ لگان زِ یہِ جایداد ٲس منشیاتٕچ اسمگلنگ سۭتۍ حٲصِل کٔرمٕتۍ غٲر قونوٗنی پٲنسہٕ سۭتۍ بناونہٕ آمٕژ۔ اَتھ بُنیادَس پٮ۪ٹھ چھُ جایداد این ڈی پی ایس ایکٹ کِس دفعاتن تحت منسلک کرنہٕ آمٕژ۔
پُلسہٕ مُطٲبِق چھُ مُلزِم فیاض احمد میر امہِ برٛونٛہہ منشیاتَس سۭتۍ وابستہٕ واریاہَن معاملَن منٛز شٲمِل۔
پولیسَن چھُ یہِ کاروٲیی منشیاتَس خٕلاف جٲری مُہِمُک اکھ اَہَم حِصہٕ قرار دِیُتمُت تہٕ چھُکھ واضح کوٚرمُت زِ منشیاتٕچ اسمگلِنگ منٛز شٲمِل افرادَن خٕلاف روزِ سخٕت قونوٗنی کاروٲیی جٲری۔
پولیسَن چھُ عوامس تہِ اپیل کٔرمٕژ زِ تِم کرَن منشیاتُک کاروبار ختم کرنہٕ تہٕ معاشرَس امہِ خطرٕ نِش صاف کرنَس منٛز تعاون جٲری۔