ایران حمایتَس منٛز کٔشیٖرِ منٛز چندہ جمع ۔ عطیاتَن منٛز چھِ نقدی، زیورات تہٕ بانہٕ شٲمِل۔

جموں و کشمیرُک اکھ نوجوان سبتین علی چھُ ساسہٕ بٔدۍ لوٗکَن منٛز شٲمِل یِمَن امریکہ تہٕ اسرٲیلَس سۭتۍ جٲری جنگَس دوران ایرانَس نقدی ، زیورات تہٕ باقی قۭمتی چیز عطیہ کران چھِ۔ آتھوارٕ پیٹھٕ چھِ وادی کشمیر کٮ۪ن شیعہ اکثریتی علاقَن منٛز لوٗکَو نقدی، سۄنہٕ زیورات، ترٛامٕکۍ بانہٕ تہٕ باقٕے قۭمتی چیٖز عطیہ کرُن شروٗع کوٚرمُت۔ یہِ مہم گٔیہِ رضاکارانہٕ طور شروع ییٚلہِ کینٛہہ لُکھ جنگہٕ سۭتۍ مُتٲثِر ایرٲنی لوٗکَن ہٕنٛدِ مددتہٕ خٲطرٕ برٛونٛہہ کُن آیہِ۔ سرینگر کِس زادوئی بالا علاقَس منٛز ووٚن سبطین علی یَن ای ٹی وی اِنٛڈیاہَس زِ: ‘ایران چھُ یہِ جنگ کُنی زَن لَڑان، تہٕ امِکۍ رہنُمَو چھِ اسلامہٕ خٲطرٕ قۄربٲنی دِژمٕژ۔ تَتہِ چھِ لوٗکَن دۄہ دِشِچہِ زِنٛدگی منٛز مُشکِلاتن ہُنٛد سامنہٕ کران، ییٚمہِ کِنۍ چھِ أسۍ کٲشِرۍ یِمن مَدد کران۔ زادوئی بالا چھُ شیعہ آبادی وول علاقہٕ، تہٕ رضاکار چھِ شہرٕک ساروٕے کھۄتہٕ بٔڑِس امام برگاہَس منٛز ایرانہٕ خٲطرٕ چندہ جمع کران۔ رضاکارَن مُطٲبِق چھِ آتھوارِ پیٹھٕ بٔڑِس تعدادَس منٛز شُرین، زنانہٕ تہٕ بُزرگ لوٗکَن نقدی، زیورات تہٕ باقٕے قۭمتی چیٖز تہِ عطیہ کٔرمٕتۍ۔