کٔشیٖرِ ہٕنٛز زنانہٕ علیحدگی پسند رہنُما آسیہ اندربی یَس دِیُت عمر قیدُک سزا، دۄن سٲتھیَن دِیُت 30 ؤرۍ یَن قٲدُک سزا، دِلہِ عدالتُک فیصلہٕ.

دِلہِ ہٕنٛدِ أکہِ عدالتَن دِیُت کٲشِرۍ علیحدگی پسند رہنُما آسیہ اندربی عمر قیدُک سزا ییٚلہِ زِ أمۍ سٕنٛدٮ۪ن دۄن قریبی سٲتھین، صوفی فہمیدہ تہٕ ناہید نسرینَس چھُ پرٮ۪تھ أکِس 30 ؤرۍ یَن قٲدُک سزا دِنہٕ آمُت۔ یہِ فٲصلہٕ دِیُت کارکردوما کورٹٕکۍ ایٚڈِشنَل سیشن جج چندر جیت سنگھَن ۔ اَمہِ برٛونٛہہ، 14 جنوری 2026 اوسُکھ ترٛیٚشوٕے غٲر قونوٗنی سرگرمین (روک تھام) ایکٹ (یو اے پی اے) تہٕ تعزیرات ہند (آے پی سی) کٮ۪ن مُختٔلِف دفعاتن تحت مُجرِم قرار دِنہٕ آمُت۔ عدالتَن اوس ترٛیٚشوے مُجرِم لبنہٕ آمُت۔ عدالتَن دِیُت مُلزِم یو اے پی اے دفعہٕ 20 (دہشت گرد تنظیمٕچ رُکُنیت)، 38 (دہشت گرد تنظیمٕچ حمایت)، تہٕ 39 (دہشت گرد تنظیمَن ہٕنٛز مدد) تحت مُجرِم قرار۔ اَمہِ علاوٕ آیہِ تِمَن پٮ۪ٹھ آے پی سی دَفعہٕ 153 اے (گروپَن درمیان دُشمنی فروغ دِنہٕ)، 153 بی (قومی اتحادَس خٕلاف بیان)، 120 بی (مُجرمانہٕ سٲزِش)، 505 (عوٲمی شرارت)، تہٕ 121 اے (ریاستَس خٕلاف سٲزِش) تہِ لاگوٗ کرنہٕ۔ این آیی اے یَن کٔر عدالتَس منٛز سخٕت سزاہٕچ منٛگ.