*سی ڈبلیو سی ہیو کٔر اکھ مَقٲمی نیوٗز پورٹل طَلب، بَغٲر مٲل مۆج سٕنٛدِ اِجَازَتہِ کٔرِکھ مَعصوٗم بَچَس اِنٹَرویوٗ*

چائلڈ ویلفیئر کمیٹی (CWC) سِریٖنَگَرَن کٔر اکھ مَقٲمی نیوٗز پورٹلَس سٟتؠ وابَستہٕ نُمٲئِنٛدَس سَمن جٲری۔ یَتھ مَنٛز اَتھ پورٹلَس پؠٹھ اِلزام چھُ لَگ اَکھ مَعصوٗم بَچَس بَغٲر کُنہِ مٲل مۆج سٕنٛدِ یا قانوٗنی سَرپَرَسٛت سٕنٛدِ مَنظوٗری ہِنٛدِ اِنٹَرویوٗ کَرُن تہٕ سُہ رِکارڈ کَرُن۔ اَتھ سٟتؠ سٟتؠ کٔرِکھ نَہ سِکوٗل اِنتِظامیہ سٕنٛز اِجَازَت حٲصِل۔اَکہِ سَمنہِ مُطٲبِق، ، کٔمیٹی ہَن کٔر ‘فیئر وائس نیوز’ سِریٖنَگَر کِس ایڈیٹَر یا مَجاز نُمٲئِنٛدَس حُکُم زِ تَمِہ پَزِ 3 جُلَے 2026 دۆپَہرِ 12 بَجے سِریٖنَگَر کِس سی ڈبلیو سی دَفترَس مَنٛز حٲضِر گَژھُن۔اَتھ سَمنہِ مَنٛز چھُ یہِ حُکُم تہِ دِیَنہٕ آمُت زِ مَجاز نُمٲئِنٛدَس سٟتؠ پَزِ سُہ رِپوٹَر یا اِنٹَرویوٗ کَرَن وول، کیمَرا مَین تہٕ باقی مِیڈِیا اَہلکار یِم اَتھ اِنٹَرویوٗ وَقَس مَوجوٗد اۆسؠ، سٟتؠ اَنُن۔سی ڈبلیو سی ہَن دۆپ زِ اَگر یہِ اِلزام پۆز ثابِت گۆو، تیلہِ ہیٛکِہ یہِ کامِہ جووینائل جسٹس (کیئر اینڈ پروٹیکشن آف چلڈرن) ایکٹ، 2015 تَحَت بَچَن ہِنٛدین حَقوٗقَن ہِنٛز خِلاف وَرزی مَنہِ آمِت، اَتھ سٟتؠ سٟتؠ نیشَنَل کَمِشَن فار پروٹیکشن آف چائلڈ رائٹس (NCPCR) طَرفہٕ مِیڈِیا رِپوٹِنٛگ بَچَن ہِنٛز پَہچان، تَنہٲئی (پرائیویسی)، عِزَت تہٕ اَفصَل مَفاد بَچاوَنہِ خٲطرِ بَنٲومِت اُصوٗلَن ہِنٛز خِلاف وَرزی مَنہِ۔کٔمیٹی ہَن چھُ اَکھ لِکھِت وَضَاحَت تہِ مَنٛگِمژ زِ کِمَن حالاتَن مَنٛز اۆس یہِ اِنٹَرویوٗ نِوانہٕ آمُت۔ اَتھ سٟتؠ سٟتؠ چھُ مِیڈِیا اِدارَس سٟتؠ سَمنہِ مَنٛز دۆپمُت زِ تِم پَزَن اَتھ اِنٹَرویوٗ ہِنٛز رِکارڈِنٛگ، نَشَر کَرمُت مَواد، یا کُنہِ قِسمُک مَنظوٗری نامہٕ (Consent) تہٕ باقی تَمام ضَروٗری دَسٛتاویزات پیش کَرنؠ۔سَمنہِ مَنٛز چھُ یہِ خَبَردار کَرنہٕ آمُت زِ کٔمیٹی بَروَنٛہہ حٲضِر نَہ گَژھُن یا مَنٛگِمژ مَعلوٗمات تہٕ دَسٛتاویزات فَرَہَم نَہ کَرُن ہیکِہ قانوٗنی کَروٲئی خٲطرِ وَجَہ بَنِتھ۔