ہندوستان تہ پاکستان گژھن کتھِ باتھِ ذریعہ معاملات حل کَرنؠ: سی ایم عمر عبداللہ

وزیر اعلیٰ عمر عبداللہن وون تھودس پؠٹھ زِ ہندوستان تہِ پاکستان گژھن کَتھِ باتھِ مَنٛز شٲمل گژھن تہِ باہمی تعلقات بہتر بناونہِ خٲطرہ کٲم کَرنؠ۔ تمن وون زِ دۄیو ہمسایہ ملوکن درمیان امن چہِ حمایت کَرنس پؠٹھ گژھہِ نہ کانہہ اعتراض آسُن۔شوپیانَس منز میڈیاہس ستی کتھ باتھ کران وون تمو زِ دۄیو ملوکن درمیان تناؤ کانہہ نئو نہِ چُھ تہِ یہِ چُھ دہائیوں پؠٹھ قٲئم، تہِ تمن وون زِ گزشتہ ؤریہِ پہلگام واقعہ پتہِ آو یَتھ مَنٛز مزید شدت۔حالیہ مَنٛز وزیراعظمس کُن لکھیمتس اکھ چٹھی ہُنٛد حوالہ دِتھ، یَتھ مَنٛز ہندوستان تہِ پاکستان درمیان تعلقات بہتر بناونچ خواہش ظاہر کَرنہِ آمژ چھِ، تمن وون زِ اَتھ کَنہِ اپیلَس پؠٹھ گژھہِ نہ کانہہ اعتراض آسُن۔تمن وون زِ جموں و کشمیر کین لیڈرن ہندین یتھین کلامن پؠٹھ کؠاز چھِ تنقید گژھان، جبکہ آر ایس ایس کین سینئر لیڈرن ہندِ کَتھِ باتھِ ہنٛدِ حق مَنٛز بیانن پؠٹھ کانہہ اعتراض چُھنہِ گژھان۔سابق وزیر اعظم اٹل بہاری واجپائی ہُنٛد حوالہ دِتھ وون تمن، "دوست ہیکَن تبدیل کَرنہِ آوِتھ، مَگَر ہمسایہ ہیکَن نہِ تبدیل کَرنہِ آوِتھ”۔ تمن مزید وون زِ مقصد چُھ کَتھِ باتھِ تہِ پُر امن روابطو ذریہ ہمسایہ ملوکن درمیان بہتر تعلقات وُچھُن