محکمہٕ ٹرانسپورٹَن چھےٚ سکوٗل شُرۍ نِنہٕ واجنہِ وینہٕ غٲر محفوظ قرار دِژٕ مژٕ۔ وینَن منٛز ہیکَن صرف 12 شُرۍ بِہتھ ، مگر سکوٗلَن منٛز استعمال گژھَن واجنٮ۪ن وینَن منٛز چھِ اکثر 15 پیٹھٕ 20 شُرۍ آسان۔ 

محکمہٕ ٹرانسپورٹَن چُھ ووٚنمُت زِ سکوٗل شُرین نِنہٕ باپتھ چھُ پرائیویٹ وینَن ہُنٛد استعمال کرُن موٹر وہیکل ایکٹ پروٹوکولَس تحت غیر محفوظ۔ محکمَن ووٚن زِ یِم ذٲتی وین چھِنہٕ ضروٗری حِفاظتی معیارَن پٮ۪ٹھ پوٗرٕ اتران۔ ریجنل ٹرانسپورٹ آفس (آر ٹی او) مُطٲبِق چھِ شُرۍ نِنہٕ تہٕ تراونہٕ خٲطرٕ استعمال گژھَن واجنہِ سکول وین ‘پوٗرٕ پٲٹھۍ غٲر قونوٗنی’۔ اَتھ سلسلَس منٛز چُھ محکمَن مٲلِس ماجہِ خبردار کوٚرمُت زِ تِم پَزِ ذٲتی وین کِرایَس پٮ۪ٹھ نِنہٕ بدلہٕ نقل و حملَس خٲطرٕ صرف منظور شُدٕ سکول بسَن ہُنٛد انتخاب کرُن۔ تِمَو دِیُت مٲلِس ماجہِ پٮ۪ٹھ زور زِ تِم کرَن یہِ یٔقیٖنی زِ شُرۍ نِنہٕ خٲطرٕ استعمال گژھن واجنہِ گاڑِ گژھن ضروٗری حفٲظتی معیارَن پٮ۪ٹھ پورٕ، تہٕ یہِ زِ سکول بسَن ہُنٛد انتخاب کرُن چھُ ساروٕے کھۄتہٕ محفوظ تہٕ بہتریٖن ژٲر۔ محکمَن ووٚن بیٚیِہ زِ سڑکہِ ہٕنٛز حفاظت چھِ اکھ جٲری عمل تہٕ یہِ ہٮ۪کو نہٕ وۄمید کٔرِتھ زِ تمام خلاف ورزی یِن راتوں راتس ختم کرنہٕ۔