عطیہ دِنہٕ والٮ۪ن ہٕنٛدِ مدتہٕ ڈسٹرکٹ ہسپتال پلوامیُٰک ایکسرے پلانٹ جدید سٔہوٗلِیاتو سۭتۍ لیس۔

  ڈِسٹرکٹ ہسپتال پلوامہ ہَس منٛز چھُ ایکس رے پلانٹ جدید بناونہٕ آمُت یُس پرٛٮ۪تھ دۄہ ساسہٕ بٔدۍ مریضَن بہتر تشخیصی تہٕ طِبی سٔہوٗلِیات فراہم کَرنہٕ یِوان چھُ۔ مقٲمی عطیہ دِنہٕ والٮ۪ن ہٕنٛدِ مٲلی مدتہٕ سۭتۍ چھِ ایکس رے پلانٹٕچ حالتس منٛز نمایاں بہتری آمٕژ کرنہٕ، ییٚمہِ سۭتۍ وۄنۍ مریضَن کم قۭمتَس پیٹھ بہتر تہٕ جدید تشخیصی سٔہوٗلِیاتن تام رسٲیی حٲصِل گژھِ۔  ہسپتالُک ایکسرے پلانٹ اوس کینٛہَس کالَس پٮ۪ٹھ خراب حالتس منٛز۔ تباہ شُدٕ دیوار، خستہٕ حال ڈھانچہٕ، تہٕ پرٲنۍ مشینری ہٕنٛدِ وجہ سۭتۍ ٲس ایکسرے خٕدمات اکثر محدود، تہٕ مشینری ہٕنٛز خرابی سۭتۍ ٲس مریضن خٲطرٕ مسلہٕ پٲدٕ گژھان۔  وۄنۍ چھُ عطیہ دِنہٕ والٮ۪ن ہٕنٛدِ مدتہٕ سۭتۍ ایکسرے پلانٹ پوٗرٕ پٲٹھۍ مرمت کرنہٕ آمُت تہٕ جدید سٔہوٗلِیاتو سۭتۍ لیس کرنہٕ آمُت، یُس مریضَن گۄڈٕنِکہِ کھۄتہٕ تیز رفتار، بہتر تہٕ زیادٕ موثر تشخیصی خدمات فراہم کرنَس منٛز مدد کرِ۔