عمر حکومتس خٕلاف بی جے پی، مرکزس خٕلاف این سی، جموں و کشمیرس منٛز گٔیہِ احتجاجی سیاست شروع۔

جموں و کشمیرس منٛز چھُ بیٚیہِ اکہِ لٹہِ سیٲسی تناؤ بڑان باسان ییٚتہِ حُکُمران جماعت نیشنل کانفرنس (این سی) تہٕ حزب اِختلاف بھارتیہ جنتا پارٹی (بی جے پی) چھُ بۄدھ وارِ دۄہ سرینگر تہٕ جموں شہرَن منٛز اکھ أکِس خٕلاف احتجاجُک اعلان کوٚرمُت۔

بی جے پی ہُنٛد احتجاج یِیہِ عمر عبداللہ سٕنٛز حکومتہٕ طرفہٕ ‘بُنیٲدی سٔہوٗلِیات فراہم کرنس منٛز ناکامی’ اجاگر کرنہٕ خٲطرٕ کرنہٕ، ییٚلہِ زن این سی کرِ جموں و کشمیرَس سۭتۍ وابستہٕ ‘پوٗرٕ نہ گژھن والٮ۪ن وعدَن’ پٮ۪ٹھ بی جے پی کِس قیادتس منٛز مرکٔزی حکوٗمتَس نِش جواب۔ یِمن مطالبن منٛز چھِ آئینی ضمانتہٕ تہٕ ریاستٕچ بحالی شٲمِل۔

بی جے پی کَرِ بۄدوارِ دۄہ صبحٲے 10 بجہِ سرینگر کلاک ٹاور پٮ۪ٹھٕ احتجاجی مارچ شُروٗع۔ پارٹی صدر تہٕ ایم پی ست شرما تہٕ جموں و کشمیر اسمبلی منٛز حزب اِختلافٕک رہنُما سنیل شرما سٕنٛدِس قیادتس منٛز گژھِ یہِ مارچ سول سیکریٹریٹَس کُن۔