جموں و کشمیر وقف بورڈُک درگاہ احاطن منٛز کھٮ۪ن بٲگراونَس تہٕ جاناوارَن کھٮ۪ن دِنس پٮ۪ٹھ پابٔنٛدی ہُنٛد اعلان۔ 

جموں و کشمیر وقف بورڈَن چُھ وقف جایدادَن تہٕ درگاہ احاطَن منٛز جاناوارَن کھٮ۪ن تہٕ باقٕے کھٮ۪ن چیٖز بٲگراونَس پیٹھ پابٔنٛدی لگٲومٕژ۔ وقف حکامو مُطٲبِق چھُ کھٮ۪ن گندٕ گی پٲدٕ کران تہٕ چھُ آوارٕ ہونٮ۪ن تہٕ باقٕے جانورن ہِنٛدِ کھٮ۪نُک ذٔریعہٕ بنان۔ وقف بورڈٕچ چیئرپرسن تہٕ بھارتیہ جنتا پارٹی (بی جے پی) ہٕچ ایگزیکٹو رُکُن درخشاں اندرابی کوٚر بڈگام ضِلعہٕ کِس ژرار ِشریفَس منٛز درگاہ کِس دورَس دوران امہِ پابٔنٛدی ہُنٛد اعلان۔ صحافیَن سۭتۍ کتھ باتھ کٔرِتھ ووٚن درخشاں  اندرابی زِ درگاہَن تہٕ خانقاہَن انٛدر کھٮ۪ن چیٖز بٲگراونہٕ سۭتۍ چھُ گندگی پھٔہلان۔ أمۍ سٕنٛدِ مُطٲبِق چھِ یِم چیٖز کۄترَن تہٕ باقی جاناوارَن کھٮ۪ن فراہم کران، یُس یِمَن مُقدس مقامَن ہٕنٛز صفٲیی تہٕ دیکھ بھال متٲثِر چھُ کران۔