لیفٹینٹ گورنرسٕنٛدِ طرفہٕ جوٚم یونیور سٹی منٛز نشہ مکت بھارت ابھیانس تحت أکس ڈاکیومنٹری نمٲیشہِ دَس۔

لیفٹینٹ گورنر منوج سنہاہن تُل جوٚم یونیور سٹی منٛز نشہ مکت بھارت ابھیانس تحت أکس ڈاکیومنٹری نمٲیشہِ ہُنٛد دَس۔ اتھ موقعس پٮ۪ٹھ کوٚر تِمو منشیاتس خلاف بیدٲری پٲدٕ کرنس منٛز یونیورسٹی ہٕنٛدٮ۪ن کوششَن ہٕندۍ تٲریف۔ تِمو ووٚن زِ منشیاتُک استعمال چھُ معاشرٕ ، خاندانن تہٕ نوجوان پُیہِ ہٕنٛدِ مستقبل باپت سنگین خطرٕ۔ منشیاتٕچ سمنگلنگ تہٕ نارکوٹیرازمس متعلق ذکر کران دیُت تِمو امِچ سپلایی نیٹ ؤرک ختم کرنس پٮ۪ٹھ زور۔ ایل جی ین ووٚن زِ منشیاتس خلاف مُہمہِ منٛز چھُ بیدٲری ، سپلایی چین ختم کرنس تہٕ اثر زدٕ نفرن ہٕنٛزِ بازآبادکٲری پٮ۪ٹھ ظۅن دِنہٕ یوان۔ Rehabilitation And Socio-Economic  Reintegration  2026سکیمہِ ہٕنز ذکر کران ووٚن تِمو زِ امہِ سکیمہِ ہُنٛد مقصد چھُ منشیاتہٕ سٍتۍ اثر زدٕ نوجوان دوبارٕ معاشرس منٛز پانناوٕنۍ۔ تِمو دیُت طٲلبِ علمن پٮ۪ٹھ زور زِ تِم کٔرِن منشیات نش پاک جموں کشمیر کِس تٲمیرس منٛز متحرک کردار ادا، تہٕ یہِ ڈاکیومینٹری یِیہِ یونیورسٹی ہٕنٛدٮ۪ن تمام شعبن تہٕ جوٚمۍ صوبہٕ کٮ۪ن دوٚیمٮ۪ن تٲلیمی ادارَن منٛز تہِ ہاونہٕ ۔