حکومتی یقین دہٲنی پتہٕ NHM مُلٲزِمن ہُنٛد ہڑتال ختم۔ 

نیشنل ہیلتھ مِشنٕکۍ (این ایچ ایم) مُلٲزِمو چھےٚ جموں و کشمیر حکوٗمت کہِ طرفہٕ واریاہ کالہٕ پٮ۪ٹھہٕ زیر التوا یِہنٛدین مُطالبَن مُتعلِق یقین دِنہٕ پتہٕ پننُن ہڑتال ختٕم کوٚرمُت۔ یہِ فٲصلہٕ آو مُلٲزم نُمٲینٛدَن تہٕ حکوٗمتَس درمیان أکِس ملاقاتس منٛزکرنہٕ، یَتھ منٛز مُلٲزمَن ہٕنٛدِ طرفہٕ تُلنہٕ آمتٮ۪ن واریاہَن مسلَن پٮ۪ٹھ کتھ آیہِ کرنہٕ۔ 

مُلٲزمو مُطٲبِق دِیُت حکوٗمتَن یِمن یٔقیٖن زِ تِہنٛزن تجویٖزَن پٮ۪ٹھ تہٕ  مطالبن  ہُنٛد  یِیہِ سام ہٮ۪نہٕ تہٕ مزید غور کرنہٕ۔ تِمَو ووٚن زِ حکوٗمتَن دِیُت این ایچ ایم مِشن ڈائریکٹرَس تہِ ہدایت زِ سُہ کرِ اکھ کوآرڈینیٹرُک تقرر یُس مُلٲزمَن تہٕ محکمَس درمیان رٲبطہٕ  کران آسہِ تہٕ تِہنٛدین مسلَن مُتعلِق باقٲعدٕ کتھ باتھ کرِ ۔ 

مُلٲزِمَو ووٚن زِ تِم چھِ حکوٗمت کِس مثبت موقفَس تہٕ میٹنگہِ دوران دِنہٕ آمتہِ یقینہٕ سۭتۍ مُطمعیٖن۔