سرینگر: محبوبہ مفتی کوٚر میرواعظ عمر فاروقَس سۭتۍ ملاقات، جموں و کشمیر کِس سیٲسی تہٕ سمٲجی صورتحالَس پٮ۪ٹھ کَتھ باتھ ۔
جموں و کشمیر چہِ سٲبِقہٕ ؤزیٖرِ اعلیٰ تہٕ پیپلز ڈیموکریٹک پارٹی ہٕنٛزِ صدر محبوبہ مفتی کوٚر حریت رہنُما تہٕ مشہوٗر مذہبی شخصیت میرواعظ عمر فاروقَس سٍتۍ سِرینگرَس منٛز أمۍ سٕنٛزِ رِہٲیشی جایہِ پٮ۪ٹھ مُلاقات ۔
دۄشوٕنی رہنُماہن درمِیان سپُد یہِ ملاقات آتھٕوارِ دۄہ دُپہرَس میرواعظ عمر فاروق سٕنٛزِ رِہٲیشہِ پٮ۪ٹھ یَتھ منٛز یِمو سمٲجی تہٕ ثقافتی مسلَن سۭتۍ سۭتۍ جموں و کشمیرٕچ موجودٕ سیٲسی صورتحالَس پٮ۪ٹھ تہِ کتھ باتھ کٔر۔
میرواعظَن ووٚن زِ "محبوبہ جی سمکھے اَز مےٚ ۔ اسہِ کٔر خطس درپیش سمٲجی خدشاتن تہٕ چیلنجن متعلق کتھ تہٕ یِم مسلہٕ اِجتمٲعی طور حل کرنہٕ خٲطرٕ دِتُکھ سارنٕے اسٹیک ہولڈرَن ہٕندِ اِکہٕ وٹہٕ گژھنہٕ کِس ضرورتس پیٹھ زور۔ اسہِ کٔر جموں و کشمیرٕچ موجودٕ سیٲسی صورتحالس پیٹھ تہِ تفصیلی بَحَث۔ مجموعی طور اوس یہِ اکھ اصل بحث۔”
دۄشوٕے رہنُماہو ٲسۍ آتھٕوارِ دۄہ سرینگرَس منٛز أکِس ‘یوتھ کانکلیوَس’ منٛز شِرکت کٔرمٕژ۔