جموں و کشمیرٕچ ریاستی حیثیتَس مُتعلِق قراردادَس پٮ۪ٹھ اسمبلی منٛز بَحَث شُروٗع، بی جے پی  پارٹی ہٕنٛزسپیکر ہٹاونٕچ منٛگ ۔

بی جے پی ایم ایل اے آر ایس پٹھانیاہَن ووٚن از ایوانَس زِ تٔمۍ چھِ جموں و کشمیر اسمبلی ہٕنٛدِ سپیکر عہدٕ پٮ۪ٹھ ہٹاونٕچ تجویز  پیش کٔرمٕژ ۔تِکیازِ تٔمۍ دِژ آییٖنٕچ خٕلاف ورزی کران رِیاستی درجہٕ  کِس قراردادس پٮ۪ٹھ بحث کرنُک اجازت۔

حزب اِختلافٕک رہنُما تہٕ بی جے پی رہنُما سنیل شرماَن ووٚن زِ سُہ چھُ جموں و کشمیرَس مُکمل ریاستُک درجہٕ دِنہٕ کِس حقَس منٛز، مگر قراردادَس منٛز خۄد مۄختٲری ہُنٛد حوالہٕ دِیُن چھُ آیینس خٕلاف۔

ییٚلہِ ایوانٕچ کاروٲیی بیٚیہِ شُروٗع سپٕز، پٹھانیا ووٚتھ تہٕ ووٚنُن سپیکرَس زِ تٔمۍ ٲس گۄڈَے قونوٗنَن ہٕنٛز خٕلاف ورزی کرنَس پٮ۪ٹھ تٔمِس خٕلاف تجویز پیش کٔرمٕژ۔ سُہ اوس جُمعہ دۄہ وزیر اعلیٰ عمر عبداللہ سٕنٛدِ طرفہٕ پیش کرنہٕ آمٕژ ریاستی قراردادُک حوالہٕ دِوان، یَتھ منٛز 2000 چہِ خۄد مۄختٲری ہٕنٛز قراردادُک ذِکر اوس کرنہٕ آمُت۔ فاروق عبداللہ سٕنٛدِس قیادتس منٛز ٲس نیشنل کانفرنسَن (این سی) 2000 منٛز خۄد مختٲری ہٕنٛز قرارداد منظور کٔرمٕژ، یَتھ منٛز 1953 برٛونٛہہ ٲییٖنی حیثیتٕچ بحٲلی ہُنٛد مُطالبہٕ اوس ۔