اسمبلی اِنتِخابات مۄکلنس تام گھرس منٛز نظر بنٛد: میر واعظ

حریت چیئرمین میر واعظ عمر فاروقَن ووٚن جُمعہ دۄہ زِ جموں و کشمیرَس منٛز اسمبلی اِنتِخابات ختم گژھَنَس تام چھِ تٔمِس گھرس منٛز نظر بنٛد روزنٕچ افواہ تہٕ تٔمِس آو نہٕ جُمعہ دۄہ پننہِ گھرٕ نٮ۪بر نیرنُک اِجازت۔أکِس ویڈیو پٲغامَس منٛز ووٚن میرواعظَن زِ "پٔتمہِ ستمبر عدالتَس منٛز گژھنہٕ پتہٕ آو مےٚ واریٛاہ کالَس پتہٕ گھرس منٛز نظر بنٛدی پٮ۪ٹھ یَلہٕ ترٛاونہٕ، ییٚمہِ پتہٕ مےٚ کینٛہَن ہفتَن خٲطرٕ یلہٕ تراونہٕ چھُ یِوان تہٕ پتہٕ چھُ بند کرنہٕ آمُت تہٕ پرٛٮ۪تھ دۄہ حُکامن ہِنٛدِس حُکمَس پٮ۪ٹھ چھِ کار میٲنِس گیٹَس برٛونٛہہ کنہِ کھڑا کرنہٕ آمٕژ تہٕ گھرس منٛز نظر بنٛد کرنہٕ یِوان تہٕ کانٛہہ وجہ دِنہٕ ورٲے چھُ وننہٕ یِوان زِ تُہۍ ہٮ۪کِو نہٕ نیبر نیرِتھ۔”تٔمۍ ووٚن زِ حُکامن ہُنٛد رٔوِیہ چھُ انتہٲئی افسوسناک تہٕ آمرانہ زِ میٲنۍ آزٲدی تہٕ رِہٲیی چھِ تِہنٛدِس حُکمَس تابع۔