4 تہٕ 5 نومبر کٔشیٖرِ منٛز ہلکہٕ شیٖن تہٕ روٗد پیٚنُک امکان۔

محکمہ موسمیات چہِ پیشن گویی مُطٲبِق چھُ نومبر کِس گۄڈٕنِکِس ہفتَس دوران وادی کٔشیٖرِ منٛز ہلکہٕ شیٖن تہٕ روٗد پیٚنُک امکان۔
کٔمِلین چُھ مشورٕ دِنہٕ آمُت زِ فی الحال ہیکن تِم پننین کھہَن تہٕ باغن منٛز پنٕنۍ کٲم جٲری تھٲوِتھ۔
مُتعلقہٕ محکمٕکۍ ترجمانَن ووٚن زِ وادی ہُنٛد موسم روزِ 29 اکتوبر پٮ۪ٹھٕ 3 نومبرَس تام عام طور خۄشٕک ۔
تِمَو ووٚن زِ 4 تہٕ 5 نومبر چھُ وادی کٮ۪ن مٲدٲنی علاقَن منٛز ہلکہٕ روٗد پیٚنُک امکان، ییٚلہِ زَن پہٲڑی علاقَن منٛز ہلکہٕ شیٖن پیٚیہِ۔
تِمَو ووٚن زِ اَمہِ پتہٕ 6 پٮ۪ٹھٕ 10 نومبرَس تام چھُ وادی ہُنٛد موسم بیٚیہِ خۄشٕک روزنُک امکان۔
أتھۍ دوران چُھ وادی منٛز رٲژ ہُنٛد درجہٕ حرارت تقریباً معموٗل پٲٹھۍ ریکارڈ کرنہٕ آمُت۔
پہلگام اوس وادی ہُنٛد سارِوٕے کھۄتہٕ سرد سیاحتی مُقام، ییٚتہِ کم از کم درجہٕ حرارت 0.8 ڈگری سیلسیس ریکارڈ کرنہٕ آمُت، ییٚلہِ زَن جموں علاقَس منٛز روٗد بانہال سارِوٕے کھۄتہٕ سرد جاے، ییٚتہِ رٲژ ہُنٛد درجہٕ حرارت 4.1 ڈگری سیلسیس ریکارڈ اوس کرنہٕ آمُت۔