جموں و کشمیرَس منٛز چھِ 511 بے زمین افرادَن 5 مرلہ زمین فی فرد فراہم کرنہٕ آمٕژ: حکوٗمت

جموں و کشمیر حکوٗمتَن ووٚن بۄدوارِ دۄہ اسمبلی منٛز زِ جموں و کشمیرَس منٛز چھِ 511 بے زمین افرادَن مکان بناونہٕ باپتھ پرٮ۪تھ کانٛہہ 5 مرلہ زمین فراہم کرنہٕ آمٕژ، ییٚلہِ زَن سکیمہِ تحت آیہِ 2,568 درخواستہٕ مُختٔلِف بُنیادَن پٮ۪ٹھ رَد کرنہٕ۔ اسمبلی منٛز أکِس سوالَس جوابَس منٛز وون حکوٗمتَن : ‘جموں و کشمیرَس منٛز چھِ کُل 511 بے زمین افرادَن پرٮ۪تھ کانٛہہ 5 مرلہ زمین فراہم کرنہٕ آمٕژ، یِمَو منٛز 234 مستفید گژھَن وٲلۍ کٔشیٖرِ منٛز تہٕ 277 جموں ڈویژنَس منٛز چھِ۔ تِمَو ووٚن زِ سارِوٕے کھۄتہٕ زِیٛادٕ تعدادَس منٛز چھِ 109 نفرَن بانڈی پورہ ضِلعَس منٛز زمین فراہم کٔرمٕژ، ییٚلہِ زَن بارہمولہ ضِلعَس منٛز 61 نفرَن تہٕ اننت ناگ ضِلعَس منٛز 30 نفرَن زمین آیہِ دِنہٕ۔ جموں ڈویژنَس منٛز آیہِ راجوری ضِلعَس منٛز 48، ڈوڈاہس منٛز 68 تہٕ کشتواڑ منٛز 55 افرادَن مکان بناونہٕ باپتھ زمین فراہم کرنہٕ۔ وونہِ گو٘ شوپِیان، بڈگام تہٕ رام بان ضِلعن منٛز آو نہٕ کانٛہہ تہِ زمین فراہم کرنہٕ۔ حکوٗمتَن ووٚن زِ اَتھ سکیٖمہِ تحت آیہِ کُل 2,568 درخاست نامنظوٗر کرنہٕ۔