حولس منٛز نار لگنُک خوفناک واقعہٕ،زٕ رہٲیشی مکان سوٗرۍ۔

شہرکِس حول علاقَس منٛز ژٔنٛدٕروارِ دۄہ شامَس نار لگنہٕ کِس خوفناک واقعَس منٛز گٔے زٕ رہٲیشی مکان سوٗرۍ۔ چشمہٕ دیٖد گواہَو مُطٲبِق لوٚگ شامَس أکِس رہٲیشی مکانس اچانک نار یُس جلدٕی أکِس نزدیکی مکانَس منٛز پھٔہلیو۔ ییٚمہِ کِس نٔتیٖجس منٛز لچھَن رۄپیہِ ہُنٛد جایدادُک نۄقصان گوٚو۔ نار تہٕ ہنگٲمی عملہٕ وٲتۍ اطلاع موصول گژھنہٕ پتہٕ فوراً واقعہٕ جایہِ تہٕ مقٲمی بسکیٖنَن ہٕنٛدِ مددتہٕ سۭتۍ آو نار ژھیوراونہٕ فائر اینڈ ایمرجنسی ڈیپارٹمنٹٕکۍ أکۍ اہلکارَن ووٚن زِ رپورٹ موصوُل گژھنہٕ پتہٕ آے داہ نار ٹینڈر واقعہٕ جایہِ سوزنہٕ، تہٕ واریاہَن گھنٹَن ہٕنٛز شٔدیٖد جدوجہد پتہٕ آو نار قوبوس منٛز اننہٕ۔ اہلکارَن مُطٲبِق، حالانٛکہِ نارُک پھٔہلُن آو مزید بڑنہٕ نِش رُکاونہٕ، مگر دۄشوٕنی رہٲیشی مکانَن ووت شٔدیٖد نۄقصان۔ تٔمۍ ووٚن زِ نارُک ابتدٲیی وجہہ ہیوٚک نہٕ معلوٗم سپدِتھ، مگر پولیسَن چھُ مقدمہٕ درٕج کوٚرمُت تہٕ واقعٕچ تفتیش شروٗع کٔرمٕژ۔