کٔشیٖرِ منٛز ونٛدٕ تیز، سونامرگ سارِوٕے کھۄتہٕ سرد جاے

حالانٛکہِ وادی کٔشیٖرِ ہُنٛد موسم چھُ خۄشٕک، مگر رٲژ ہُنٛد درجہٕ حرارت آو بیٚیہِ اکہِ لٹہِ منجمد جایہِ کھۄتہٕ بۄن درٕج کرنہٕ، ییٚمہِ سۭتۍ ونٛدٕ ہُنٛد سردی تیز گٔیہِ۔ محکمہٕ موسمیات مُطٲبِق روٗد وادی ہُنٛد سیاحتی مقام سونمرگ سارِوٕے کھۄتہٕ سرد علاقہٕ، ییٚتہِ کم از کم درجہٕ حرارت منفی 7.3 ڈگری سیلسیس ریکارڈ آو کرنہٕ۔ سرینگرَس منٛز آو کم از کم درجہٕ حرارت منفی 2.2 ڈگری سیلسیس ریکارڈ کرنہٕ، ییٚلہِ زَن پٔتمہِ رٲژ ہُنٛد درجہٕ حرارت اوس 3.0 ڈگری سیلسیس ریکارڈ کرنہٕ آمُت۔ وادی ہٕنٛدٮ۪ن مشہوٗر سیاحتی مُقامَن، گُلمرگ تہٕ پہلگامَس منٛز آو کم از کم درجہٕ حرارت بِلترتیب منفی 5.4 ڈگری سیلسیس تہٕ منفی 4.4 ڈگری سیلسیس ریکارڈ کرنہٕ۔ سرحدی ضِلعہٕ کُپواڑہَس منٛز آو رٲژ ہُنٛد درجہٕ حرارت منفی 2.0 ڈگری سیلسیس درٕج کرنہٕ، تہٕ قاضی گُنٛڈ شہرَس یَتھ گیٹ وے کشمیر ونان چھِ، آو منفی 1.8 ڈگری سیلسیس ریکارڈ کرنہٕ۔ جٔنوٗبی کٔشیٖرِ ہِنٛدٮ۪ن ضِلعن اننت ناگ، پلوامہ، شوپیاں تہٕ کُلگامَس منٛز آو کم از کم درجہٕ حرارت بِلترتیب منفی 2.7 ڈگری سیلسیس، منفی 3.8 ڈگری سیلسیس، منفی 4.8 ڈگری سیلسیس تہٕ منفی 0.5 ڈگری سیلسیس ریکارڈ کرنہٕ۔