*پلوٲمس منٛز دہشت گرد سٲتھی گِرِفتار، ہتھیار تہٕ دھماکہٕ خیز مواد ضبط*
جنوبی کشمیر کِس پلوامہ ضِلعَس منٛز کٔر سیکورٹی فورسَن بَٹہٕ وارِ دۄہ راجپورہَس منٛز أکِس مُشترکہٕ کاروٲیی دوران اکھ دہشت گرد سٲتھی گِرِفتار تہٕ کوٚرُکھ ہتھیار تہٕ دھماکہٕ خیز مواد ضبط۔ أکہِ اہلکارَن ووٚن خبر رساں ایجنسی کشمیر نیوز آبزرور (کے این او) زِ یہِ کاروٲیی ٲس پلوامہ پولیسَن فوجٕچ 44 راشٹریہ رائفلز تہٕ سی آر پی ایف چہِ 183 بٹالینَس سۭتۍ مخصوٗص انٹیلی جنس معلوماتَن ہٕنٛدِس بُنیادَس پٮ۪ٹھ رٔلِتھ کٔرمٕژ۔ مُشترکہٕ ٹیٖمن کٔر راج پورہ کِس سی بی ناتھ روڈَس سۭتۍ قصبیار علاقَس منٛز تلاشٕچ کاروٲیی شُروٗع۔ کاروٲیی دوران آو اکھ دہشت گرد سٲتھی ییٚمِس کاچی پورہُک محمد عمر ملک ناوٕ سۭتۍ شناخت سپدان اوس، رٔٹنہٕ۔ سیکورٹی فورسَن کٔر أمۍ سٕنٛدِس قبضَس منٛز ہتھیار، دھماکہٕ خیز مواد تہٕ باقی مُجرِم مواد برآمد یِمَن منٛز اکھ پستول، میگزین، زندٕ گولہٕ بوروٗد، تہٕ زٕ ہینڈ گرنیڈٕ شٲمِل چھِ۔ راجپورہ پُلسہٕ تھانس منٛز چھُ آرمز ایکٹ کِس مُتعلقہٕ دفعاتن تحت ایف آئی آر نمبر 75/2026 تحت مقدمہ درٕج کرنہٕ آمُت۔