پلوامہ: غٲر قونوٗنی کان کنی خٕلاف کریک ڈاوُن  تیز۔ أکِس ہفتَس منٛز آیہِ 55 ایف آئی آر درٕج، 66 نفرَن ہُنٛد ناو تہٕ 65 گاڑِ آیہِ ضبط کرنہٕ۔

قۄدرتی وسٲیلَن نۄقصان واتناون والٮ۪ن خٕلاف کاروٲیی کٔرِتھ کٔر پلوامہ پولیسَن واریاہَن جاین پٮ۪ٹھ چوکہِ قٲیِم تہٕ درجن وادٕ نفر گِرِفتار۔ پلوٲمس منٛز چھےٚ پولیسَن پوٗرٕ ضِلعَس منٛز غٲر قونوٗنی کان کنی تہٕ لۄکٕٹۍ معدنیاتچہِ غٲر مجاز نقل و حملَس خٕلاف کاروٲیی مٔزیٖد تیز کٔرمٕژ۔ حساس علاقَن منٛز چھِ لگاتار نگرٲنی تہٕ جانچ یِوان کرنہٕ، غٲر قونوٗنی سرگرمیَن منٛز شٲمِل لوٗکَن تہٕ گاڑٮ۪ن خٕلاف چھےٚ سخٕت قونوٗنی کاروٲیی جٲرِی۔ پُلسہٕ مُطٲبِق چھِ پٔتِمِس ہفتَس منٛز غٲر قونوٗنی کان کنی سۭتۍ وابستہٕ مُختٔلِف معاملَن منٛز 55 ایف آئی آر درٕج کٔرمٕژ، یِمَن منٛز 66 نفرَن ہُنٛد ناو چھُ دِنہٕ آمُت۔ کاروٲیی دوران کٔر پولیسَن 65 گاڑِ تہٕ مشینری تہِ ضبط۔ ضبط کرنہٕ آمٕژ گاڑٮ۪ن منٛز چھِ 43 ٹِپر تہٕ ڈمپر، 20 ٹریکٹر، تہٕ 2 جے سی بی/ایل اینڈ ٹی مشینہٕ شٲمِل، یِم سٲری غٲر قونوٗنی طور سیٚکہِ، باجِر، میٚژ تہٕ باقٕے معموٗلی معدنیات کڑنَس یا منتقل کرنس منٛز شٲمِل چھِ لبنہٕ آمٕتۍ۔