شیخ عبداللہ سٕنٛز 44 ہ برسی : حضرت بلَس مَنٛز  تِہٕنٛدِس مزارس پٮ۪ٹھ قرآن خوٲنی منعقد۔

از  چھےٚجموں و کشمیر کِس سٲبِقہٕ ؤزیٖرِ اعلیٰ تہٕ نیشنل کانفرنسہٕ کِس بٲنی شیخ محمد عبداللہ سٕنٛز 44 برسی مناونہٕ یِوان، یُس بٔڑِس پیمانَس پٮ۪ٹھ شیر کشمیر ناوٕ سۭتۍ زاننہٕ چھُ یِوان۔

خبرو مُطٲبِق آیہِ حضرت بل نسیم باغَس منٛز  منٛز صُبحٲے 10 بجہِ تٔمۍ سٕنٛدِس  مزارس منٛز اکھ خاص قرآن خوانی تہٕ اجتمٲعی فاتح خوٲنی منعقد کرنہٕ۔

پارٹی صدر ڈاکٹر فاروق عبداللہ، وزیر اعلیٰ عمر عبداللہ تہٕ باقی سینئر رہنُما ہو کٔر اتھ تقریبہِ منٛز احترام سان شرکت ۔

ایکسس پٮ۪ٹھ  أکِس پوسٹَس منٛز ووٚن جے کے این سی یَن زِ "اَز 8 ستمبر چھِن أسۍ شیر کشمیر شیخ محمد عبداللہ  تسٕنٛزِ44 برسی پٮ۪ٹھ یاد کران، یٔمۍ سٕنٛز زِنٛدگی جموں و کشمیر کٮ۪ن لوٗکَن ہٕنٛدِ عزت، حقوٗق تہٕ خواہشَن خٲطرٕ وقف ٲس”۔

پارٹی ووٚن بیٚیہِ زِ أسۍ چھِ تٔمۍ سٕنٛز قیادت یاد کران، تٔمۍ سٕنٛزِ میراثُک احترام کران تہٕ أکِس اعلیٰ شخصیتَس خراج تحسین پیش کران یُس نسلن متاثر کران چھُ۔”