کشمیر: ڈیوٹی نِشہِ  غٲرحٲضر ‘سی آر ایم آئی’  یس وجہ بتاو نوٹس جٲری، جموں و کشمیرَس منٛز چھِ میڈیکل انٹرن ہُنٛد ماہانہٕ وظیفہٕ 12,000 روپیو پٮ۪ٹھہٕ 30,000 رۄپیہِ بڑاونَس پٮ۪ٹھ احتجاج  جٲرِی۔ 

سکیمز میڈیکل کالج بمنہ کٮ۪و حکامَو چھِ کلینیکل ریزیڈنٹ میڈیکل انٹرنزَن (سی آر ایم آئیز) شوکاز نوٹس جٲری کٔرمٕتۍ یِم پٔتمہِ ہفتہٕ پیٹھٕ ڈیوٹی نِشہِ غٲر حٲضِر چھِ۔ سکیمز حکامَن ہٕنٛدِ طرفہٕ جٲری کَرنہٕ آمژِنوٹسہِ منٛز چھُ ونٛنہٕ آمُت زِ ‘تِہنٛزِ غٲر موجوٗدگی سۭتۍ چھُ ہسپتالَس منٛز مریضَن ہٕنٛز دیکھ بھال تہٕ ہنگٲمی خٔدمژٕ سیٹھاہ مُتٲثِر گٔمژٕ۔ نوٹسہِ مُطٲبِق چھُ اِنتِظامیہَن سی آر ایم آییَن ہٕنٛزِ غٲر حٲضِری سنجیدگی سان نِمٕژ تہٕ چھُکھ صورتحال تشویشناک قرار دِیُتمُت، خاص طور پٲٹھۍ مریضَن ہٕنٛز معموٗل دیکھ بھال تہٕ ہنگٲمی خدماتَن پیٹھ امِکۍ مُمکِنہٕ اثراتَن پیٹھ غور کرنہٕ پتہٕ۔ نوٹسہِ منٛز اوس وننہٕ آمُت زِ مذکورہ کلینکل ریزیڈنٹ میڈیکل انٹرنَو اوس شٲمِل گژھنہٕ وِزِ اکھ حلف نامہٕ جمع کوٚرمُت یَتھ منٛز تِمَو نظم و ضبط برقرار تھاونُک تہٕ میڈیکل کالج کہِ قٲیدٕچ پابندی کرنُک عہد اوس کوٚرمُت۔