امیرآباد ترالَس منٛز آبٕچ کٔمی پٮ۪ٹھ عوٲمی احتجاج،  مقٲمی لُکو طرفہٕ ہائی وے بند کرنچ دھمکی۔

وادی ہٕنٛدٮ۪ن شُمٲلی تہٕ جٔنوٗبی حِصَن منٛز چھُ حالٕے چٮ۪نہٕ آبٕچ کٔمی ہُنٛد مسلہٕ تیز گوٚمُت، ییٚمہِ سۭتۍ مقٲمی آبٲدی سٮ۪ٹھاہ پریشٲنی درپیش چھےٚ۔ أتھۍ دوران چُھ جل شکتی محکمَن عوامس سۭتۍ مشورٕ کرنہٕ ورٲے، امیرآباد، ترالَس منٛز أکِس آبہٕ سکیمہِ پٮ۪ٹھ بیٚیِس گامَس آب فراہم کرنُک منصوٗبہٕ بنٛوٚومُت، ییٚمہِ کِنۍ گامہٕ کٮ۪ن لوٗکَن سخٕت اعتراضات  چھِ ۔ اتھ فٲصلَس خٕلاف کوٚر امیرآباد ترال کٮ۪و لوٗکَو مقٲمی آبہٕ فراہمی ہٕنٛدِ تلاوٕ پٮ۪ٹھٕ ہیرڈومیر کِس پیر محلہ کِس نزدیٖکی گامَس منٛز آب منتقل کرنس پٮ۪ٹھ  خاموش احتِجاج۔ مُظٲہِرینو ووٚن زِ تِمَن چھِ پانہٕ صاف چٮ۪نہٕ آب حٲصِل کرنس منٛز سٮ۪ٹھاہ مُشکِلاتن سٍتۍ لڑ تہٕ مُتعلقہٕ حکامَو چھُنہٕ تِہُنٛد مسلہٕ مستقل طور حل کرنہٕ خٲطرٕ کانٛہہ ٹھوس قدم تُلمت۔