جموں و کشمیرُک موسم واریاہَس حدس تام خۄشٕک روزنُک امکان۔ پیٹھمین علاقن منٛز ہلکہٕ شیٖن تہٕ از شامَس مٲدٲنی علاقن منٛز روٗدُک پٮ۪نُک امکان۔

جموں و کشمیرُک موسم چھُ وُنکینَس خۄشٕک، تہٕ محکمہٕ موسمیاتَن چھُنہٕ 10 نومبر شامَس تام موسمَس منٛز کُنہِ بٔڑ تبدیلی ہٕنٛز پیشن گویی کٔرمٕژ۔ وونہِ گو٘ 5 نومبر شامَس چھِ کینٛہَن جاین ہلکہٕ روٗد پیٚنٕچ پیشن گوئی، ییٚلہِ زَن وادی کشمیر کٮ۪ن ہیٚرمٮ۪ن علاقن منٛز چھُ ہلکہٕ شیٖن پیٚنُک امکان۔

محکمہٕ موسمیات مُطٲبِق چھُ از آسمانَس پٮ۪ٹھ اوٚبرُن ؤلِتھ، تہٕ شامَس ہیکہِ کینٛہَن جاین ہلکہٕ روٗد پیٚتھ، ییٚلہِ زن تھزرٮ۪ن پہٲڑی علاقن منٛز ہلکہٕ شیٖن پیٚنُک امکان۔ اَمہِ پتہٕ چھُ 6 پٮ۪ٹھٕ 9 نومبرَس تام موسم واریاہَس حدس تام خۄشٕک روزنُک امکان۔

محکمہٕ موسمیات مُطٲبِق چھُ 10 تہٕ 11 نومبر موسم عام طور اوٚبُر آسنُک امکان۔ 10 نومبر دوہ دوپہرٕ پتہٕ یا شامَس چھُ کینژن جاین ہلکہٕ روٗد پیٚنُک امکان، تہٕ کٔشیٖرِ کٮ۪ن پیٹھمٮ۪ن علاقن منٛز ہلکہٕ شیٖن پیٚنُک امکان۔ پتہٕ روزِ 12 تہٕ 13 نومبر آسمان کُنہِ حدس تام زیادٕ تر اوٚبر، کینٛہن جاین ہلکہٕ روٗد ممکن.