وزیر اعلیٰ عمر عبداللہ ہَن چھُ ماڈل ضابطہ اخلاقٕچ خلاف ورزی کٔرمٕژ: سنیل شرما

بی جے پی ہٕنٛدِ سینئر رہنُما تہٕ اسمبلی منٛز حزب اختلافٕکۍ رہنُما سنیل شرماَن کوٚر بۄدوارِ دۄہ الزام زِ وزیر اعلیٰ عمر عبداللہ ہَن چھُ بڈگامَس منٛز نیشنل لا یوٗنیورسٹی منٛز کلاس شُروع کرنُک اعلان کٔرِتھ ماڈل ضابطہ اخلاقٕچ خلاف ورزی کٔرمٕژ۔ اسمبلی اجلاس پتہٕ نامہ نگارن سۭتۍ کتھ باتھ کٔرِتھ، سنیل شرماَن ووٚن زِ چونکہ بڈگام حلقَس منٛز چھِ ضمنی انتخابٕچ عمل جٲری، اَمہِ مۄکھٕ چھُ وزیر اعلیٰ سُنٛد کانٛہہ تہِ نوٚو ترقیاتی اعلان اِنتخٲبی قونوٗنَن ہٕنٛز خٕلاف ورزی کِس ضمرَس منٛز یِوان۔ تٔمۍ ووٚن: ‘اسمبلی فلورَس پٮ۪ٹھ دِیُت مسٹر عمر عبداللہ ہَن بڈگامَس منٛز نیشنل لا یوٗنیورسٹی منٛز کلاس شُروع کرنُک یقین دِوان، یُس ماڈل ضابطہ اخلاقَس خلاف چھُ۔ تٔمِس پزِ امہِ غلطی ہٕنٛدِ اخلٲقی بنیادن پیٹھ استعفیٰ دِنۍ۔’ شرماَن ووٚن زِ بی جے پی چھُ یہِ معاملہٕ الیکشن کمیشن آف انڈیا کِس نوٹس منٛز اوٚنمُت تاکہِ رسمی کاروٲیی ییہِ کرنہٕ۔ بی جے پی رہنُما سٕنٛدِ مُطٲبِق پَزِ وزیر اعلیٰ سمجُن زِ اِنتِخابی عملَس دوران چھُنہٕ کُنہِ نٔوِس سکیم یا اِدارُک اعلان کرُن مُنٲسِب۔