جموں و کشمیر اسمبلی ہٕنٛز کاروٲیی ختم۔ 5 بِلہٕ منظوٗر، سَتھ ہتو کھۄتہٕ زِیٛادٕ سوالَن پیٹھ بحث۔

جموں و کشمیر قانون ساز اسمبلی ہٕنٛدۍ سپیکر عبدالرحیم راتھرَن کوٚر جُمعہ دۄہ اعلان زِ ایوانٕچ کاروٲیی یِیہِ غٲر معینہ مدتا تام مُلتوی کرنہٕ، ییٚمہِ سۭتۍ نوَن دۄہَن ہُنٛد اجلاس ختٕم سپُد۔ اَتھ اجلاسس دوران آے راجیہ سبھایہِ ہٕنٛزن ژورن سیٖٹَن ہٕنٛدۍ اِنتِخابات کرنہٕ تہٕ واریاہ اَہَم سرکٲرۍ بِلہٕ آیہِ منظوٗر کرنہٕ۔ اجلاس روٗد مجموعی طور پُر امن تہٕ منظم اندازس منٛز پکان، حالانکہ بعض اوقات اوس ایوانس منٛز کانٛہہ ہنگامہٕ گژھان۔ اتھ عرصس دوران آیہٕ پانٛژھ سرکٲرۍ بلن ہٕنٛز منظوری دِنہٕ، ییٚلہ زن دۄن نجی ارکانن ہٕنٛزن قراردادن پیٹھ آو بحث کرنہٕ۔ اسمبلی سیکرٹریٹ کِس اعداد و شمار مُطٲبِق گٔے اجلاسَس دوران کُل 732 سوال موصول یِمَو منٛز 682 سوال آے منظوٗر کرنہٕ، 29 سوالَن پٮ۪ٹھ آیہِ تفصیلہٕ سان بحث کرنہٕ، تہٕ ارکانَو تُلۍ 73 ضمنی سوال۔ اَمہِ علاوٕ آیہِ ایوانَس منٛز 97 زیرو آورَن ہٕنٛدٮ۪ن مسلَن پٮ۪ٹھ تہِ بحث کرنہٕ۔ اجلاسَس منٛز آیہِ ژۄدہَن پرائیویٹ ارکانَن ہٕنٛدۍ بل پیش کرنہٕ، ییٚلہِ زَن 33 پرٛٲنۍ بِلہٕ زیر التوا چھِ۔ کُل 41 پرائیویٹ ممبرن ہٕنٛدیو بلَو منٛز آیہِ صرف 8 ہن پیٹھ بَحَث کرنہٕ۔