سرینگر-جموں شاہراہَس پٮ۪ٹھ گاڑٮ۪ن ہٕنٛز سخٕت چیکنگ، اضٲفی اہلکارن ہٕنٛز تہِ تعیناتی

مشکوک سرگرمیہِ رُکاونہٕ تہٕ کُنہِ تہِ غٲر قونوٗنی یا ممنوعہ سامانٕچ نقل و حمل رُکاونہٕ خٲطرٕ آیہِ سرینگر-جموں شاہراہَس تہٕ باقی اہم سڑکَن پٮ۪ٹھ گاڑِین ہٕنٛز چیکنگ ہٕنٛز سخٕت مُہِم شُروٗع کرنہٕ۔ حکامَو مُطٲبِق چھِ پولیس ٹیمہٕ مُختٔلِف اہم جاین پٮ۪ٹھ تعینات کرنہٕ آمٕژ، یِمَن منٛز ذٲتی گاڑِ، تجٲرتی ٹرانسپورٹ تہٕ موٹر سائیکل شٲمِل چھِ۔ أکۍ سینئر پولیس افسرَن ووٚن زِ یِم چیکنگ کاروٲیییہِ چھےٚ امن و امان برقرار تھاونہٕ، جُرُم رُکاونہٕ تہٕ عوٲمی تحفظ یقینی بناونہٕ باپتھ کرنہٕ یِوان۔ أمۍ سٕنٛدِ مُطٲبِق چھِ اَمہِ قٕسمٕکۍ احتِیٲطی اِقدامات غٲر قونوٗنی نقل و حرکتٕچ حوصلہ شکنی کران، مُجرِم عناصرن ہٕنٛز شناخت کرٕنۍ چھِ سہل بناوان، تہٕ پُلیٖسس پٮ۪ٹھ چھِ عوامُک اعتماد بڑاوان۔ پولیسَن چھےٚ عوامس اپیل کٔرمٕژ زِ تِم کٔرِن چیکَس دوران پوٗرٕ تعاون تہٕ دِیِنۍ کُنہِ تہِ شَکاوَر نفر یا سرگرمی ہٕنٛز اطلاع فوری طور نزدیٖکی پُلیٖس تھانس منٛز۔