چاڈورابڈگامَس منٛز منشیات فروش گِرِفتار۔ چرس ہیوٗ مادٕ برآمد : پولیس
نشاور ادوِیات فروشَن خٕلاف بٔڑِس پیمانَس پٮ۪ٹھ کریک ڈاوُن برقرار تھٲوِتھ کوٚر جموں و کشمیر پولیسَن بودوارِ دۄہ وسطی کشمیر کِس بڈگام ضِلعہٕ کِس چاڈورا علاقَس منٛز اکھ منشیات فروش گِرِفتار تہٕ أمِس نِش کوٚرُکھ بٔڑِس مقدارَس منٛز چرٕس ہیوٗ ممنوعہ مادٕ ضبط۔ پُلسہٕ کہِ ترجمانَن ووٚن أکِس بیانَس منٛز زِ چڈورا پُلسہٕ تھانہٕ چہِ أکہِ جمٲژ وُچھ گنجی باغ گامَس منٛز معموٗل گشتَس دوران اکھ شَکاوَر شخٕص یُس نایلان بیگ ہٮ۪تھ اوس۔ أمۍ ووٚن زِ پولیس وُچھِتھ کٔر نفرَن موقعہٕ پٮ۪ٹھٕ ژلنٕچ کوٗشش مگر سُہ آو جلدی رٔٹنہٕ۔ پُلسہٕ ترجمانَن دِژ اطلاع زِ تلٲشی دوران آیہِ نایلان بیگَس منٛز تقریباً 7 کِلوگرام تہٕ 910 گرام نیم پروسیسڈ چرٕس ہیوٗ ممنوعہ مادٕ برآمد کرنہٕ۔ مُلزِم سٕنٛز شناخت چھِ گوپال پورہ کِس روزَن وٲلِس عبدالقیوم بٹ سُنٛد نیٚچُو، مہربان احمد بٹ ناوٕ سۭتۍ کرنہٕ آمٕژ۔ تٔمۍ ووٚن زِ اَتھ سلسلَس منٛز چھُ چاڈورا پُلسہٕ تھانس منٛز ایف آئی آر نمبر 208/2025 سۭتۍ این ڈی پی ایس ایکٹَس تحت اکھ مقدمہ درٕج کرنہٕ آمُت، تہٕ مٔزیٖد تفتیش چھُ شُروٗع کرنہٕ آمُت۔