زوجیلا پاس فروری پتہٕ تہِ گۄڈٕنِچہِ لَٹہِ یَلہٕ، شیٖن پیٚنہٕ باوجوٗد تہِ روٗد ٹریفک جٲری۔

وادی کشمیر تہٕ لداخس درمیان زمینی رٲبطہٕ خٲطرٕ انتہٲئی اَہَم جوجیلا پاس روٗد فروری کِس ٲخرس پتہٕ گۄڈٕنِچہِ لَٹہِ یلہٕ، یوٚس خٕطس منٛز نقل و حمل تہٕ فراہمی ہٕنٛدِ لحاظہٕ اکھ اہم ترقی ماننہٕ چھِ یِوان۔ بارڈر روڈز آرگنائزیشنَن کٔر جُمعہ دۄہ اَمیُک تصدیٖق کٔرِتھ وَنُن زِ سٮ۪ٹھاہ شیٖن پیٚنہٕ باوجوٗد چھُ سرینگر-لیہہ شاہراہَس پٮ۪ٹھ واقعہٕ یہِ اَہَم درٕ چُھ کٲم کران۔
تقریباً 11,500 فٹ تھزرَس پٮ۪ٹھ واقعہٕ، جوجیلا درٕ چھُ لداخ وادی کٔشیٖرِ سۭتہِ رلاون واجیٚنۍ اکھ اہم وَتھ ، یُس نہ صِرِف شہری ضٔروٗرِیاتن ہِنٛزِ فراہمی بلکہِ فوجی نقل و حرکتہٕ خٲطرٕ تہِ اَہَم ماننہٕ یِوان چھُ ۔
بی آر او مُطٲبِق چھُ ییٚمہِ ؤرۍ یہِ سخٕت موسمی حالات تہٕ سٮ۪ٹھاہ شیٖن پیٚنہٕ باوجوٗد تہِ تِمو کامیٲبی سان یہِ اہم پہٲڑی وتھ یلہٕ تھوومٕژ، یُس ونٛدَس دوران رٲبطہٕ برقرار تھاونَس منٛز اکھ تٲریٖخی سنگ میل چھُ۔
سوشل میڈیا پلیٹ فارم ایکس یَس پٮ۪ٹھ جٲری کَرنہٕ آمتِس أکِس بیانَس منٛز وون بی آر او یَن زِ زوجیلہ کِس تھزرَس پٮ۪ٹھ چھُ تٲریخ بناونہٕ آمٕژ، تِکیٛازِ گۄڈٕنِچہِ لَٹہِ روٗد یہِ پاس 28 فروری پتہٕ تہِ یَلہٕ۔