رفیع آبادَس منٛز  سڑکَن پٮ۪ٹھ میکڈم بِچھاونٕچ کٲم شُروٗع، یہِ  چھےٚ اکھ انتہٲیی اَہَم سڑک تہٕ امِچ حالت ٲس واریاہَو ؤر یَو پٮ۪ٹھٕ کٲفی خراب : حُکام    

شُمٲلی کٔشیٖرِ ہٕنٛدِس بارہمولہ ضِلعَس منٛز اچابل تہٕ رفیع آباد کٮ۪ن باقٕے حِصَن منٛز چھُ آر اینڈ بی تہٕ واتراگم ڈویژنَن سڑکَن پٮ۪ٹھ میکڈم بِچھاوُن شُروٗع کوٚرمُت۔ 

یِم سڑکہٕ آسہٕ واریہو ؤریو پیٚٹھٕ واریاہ خراب حالتس منٛز، یمہٕ سۭتۍ مقٲمی لوٗکن سۭتۍ سۭتۍ  مٮ۪ون ہٕنٛزِصنعژ منٛز شٲمل لوکن خٲطرٕ تہٕ مشکلہٕ پٲدٕ گژھان آسہٕ۔ رفیع آبادَس منٛز چھےٚ اچابل سڑک خاص طور اہم، تِکیٛازِ مٮ۪وٕ سۭتۍ بٔرِتھ گاڑِ چھِ دۄہے اَمہِ وتہِ کِنۍ سوپور فروٹ بازرَس کُن گژھان۔ یہِ سڑک چھِ بارہمولہ ضِلعہٕ کپواڑہ تہٕ باقٕے علاقن سۭتۍ تہِ رلاوان ۔ 

حکامَو ووٚن زِ یہِ چھےٚ اکھ اَہَم سڑک تہٕ یہِ ٲس واریاہَو ؤر یَو پٮ۪ٹھٕ خراب حالتَس منٛز۔ حالانٛکہِ سڑکہِ پٮ۪ٹھ میکاڈمٕچ کٲم گٔیہِ ییٚمہِ ؤر یہِ کِس ٲخٕرَس منٛز شُروٗع، وۄمید  چھےٚ زِ یہِ گژھِ جل مُکمل۔ سڑکہِ ہٕنٛز بہتری سۭتۍ میلہِ زٔمیٖن دارن تہٕ مٮ۪وٕ سۭتۍ بٔرِتھ گاڑٮ۪ن فٲیدٕ یِم ہیٚرمٮ۪و علاقَو پٮ۪ٹھٕ مٮ۪وٕ بازرَن تام سفر کران چھےٚ۔